Go‘zallik va o‘ziga bo‘lgan ishonch ko‘plab insonlar uchun muhim ahamiyatga ega. Biroq ba’zida bu istak insonlarni o‘zining tabiiy ko‘rinishidan uzoqlashtirib, ekstremal choralar ko‘rishiga olib keladi.
Xitoylik bloger qiz Chjou Chun o‘zida yuzdan ortiq plastik jarrohlik amaliyotlari o‘tkazgani buning yaqqol misolidir. U TikTok’dagi makiyaj yoki raqs videolari bilan emas, balki ko‘plab operatsiyalarni o‘tkazgani hamda barcha o‘zgarishlarni obunachilari bilan bo‘lishib kelgani bilan mashhur.
Chjou Chuna 2001-yilda tug‘ilgan va ilk bor 13 yoshida jarrohlik stoliga yotgan. U Xitoyning Weibo ijtimoiy tarmog‘ida o‘z operatsiyalari haqida ochiqchasiga ma’lumot beradi, oldingi va keyingi suratlarni joylashtirib boradi.
Uning birinchi operatsiyasi blefaroplastika — qovoqdagi ortiqcha teri, yog‘ yoki mushak to‘qimalari olib tashlanadigan jarrohlik amaliyoti bo‘lgan. Qizning nazarida uning barcha sinfdoshlari allaqachon “yevropacha ko‘zlar” bilan yurgani uchun go‘zal, u esa xunuk ko‘rinishda qolib ketgan edi.
Chjou aydol (barcha hurmat qiladigan va taqlid qiladigan mashhur personaj)larning katta-katta ko‘zlari, o‘tkir burunlari va anime qahramonlaridagidek qirrali jag‘lari bilan o‘zini taqqoslar edi. Ayniqsa, u Xitoy aktrisasi Ester Yuga o‘xshashni juda istar edi. U doramalarda Esterni ko‘rib: “Mana shunday ko‘rinishda bo‘lishim kerak, ana o‘shanda meni yaxshi ko‘rishadi”, deb o‘ylardi.
Chjou ota-onasidan operatsiya uchun yordam so‘radi, ular esa qizini bu ishdan qaytarish o‘rniga uni qo‘llab-quvvatlashdi. Onasi: “Agar chiroyli bo‘lishni istasang, buni iloji boricha ertaroq boshlash kerak”, dedi.
Ularning oilasi badavlat bo‘lgani uchun pul bilan bog‘liq muammo yo‘q edi. Chjou ota-onasiga shart qo‘ydi: yo qiz maktabni tashlab ketadi, yoki ko‘zini operatsiya qildiradi. Ota-ona operatsiyani tanlashdi. Chjou bu haqda eslab shunday deydi:
“Qovoq oldirish operatsiyasidan keyin sinfdoshlarim menga nisbatan yaxshiroq munosabatda bo‘la boshladi va men plastik jarrohlikning shirin ta’mini tatib ko‘rgan edim”.
Keyin esa yillar davomida uzluksiz operatsiyalar boshlandi: rinoplastika, yonoqlarni chiqarish, peshonani tortish, lablarni shishirish, qoshlarni o‘zgartirish... Chjouda jag‘ shakli uch marta o‘zgargan, chunki birinchi operatsiyadan keyin uning dahan qismi “juda o‘tkir” bo‘lib qolgan edi, ikkinchisidan keyin esa “yetarlicha animega o‘xshamasdi”. Bunday amaliyotlardan uning yuzi qattiq og‘rigan, ovqat yeyolmagan, ammo Chjou kameraga tabassum qilib: “Men mukammallik tomon ketyapman”, deb dadil aytgan.
Bir necha yil ichida u yuzdan ortiq operatsiyani boshidan o‘tkazdi. Umumiy xarajat 4 million yuandan oshgan, bu taxminan 650 ming AQSH dollariga teng. Onasi bularning barchasini to‘lab borgan. Ular Pekin, Shanxay va Seuldagi eng yaxshi klinikalarga murojaat qilgan.
16 yoshga kelib Chjou Chun minglab obunachilar va millionlab layklar bilan mashhur bloger va inflyuenserga aylandi. Foydalanuvchilar unga maqtovlar yozishar, ko‘rinishini ideal deb atashar, doramalardagi qahramonlarga qiyoslashar va uning tashqi ko‘rinishiga qoyil qolishardi. Ko‘pchilik uni “tirik Barbi” deb atardi. Ammo bu obraz ortida ko‘plab muammolar bor edi.
Real hayot internetdan tubdan farq qilar edi. 2020-yilda pandemiya sababli ko‘pchilik uyda o‘tirgan paytda Chjou 20 marta jarrohlarga murojaat qilgan. Avvaliga qizning xotirasida muammolar boshlandi, so‘ng doimiy og‘riqlar, shish va ko‘karishlar bezovta qila boshladi. Uning terisi shu darajada ta’sirchan bo‘lib qolgan ediki, Chjou yonboshlab uxlay olmasdi.
“Men hech qachon o‘zimning tashqi ko‘rinishimdan qoniqmayman. Har doim navbatdagi operatsiyadan keyin yaxshiroq ko‘rinaman deb o‘ylayman. Hatto ovqat va suvdan voz kechishga ham tayyorman, lekin plastik jarrohliksiz yashay olmayman. Men jarrohlar kasbini hurmat qilaman va narkozga qarshi emasman. Chunki og‘riqlardan emas, balki odamlar ko‘z o‘ngida xunuk ko‘rinishdan qo‘rqaman”, deydi u.
Eng dahshatli tomoni shundaki, Chjou hali ham o‘zini “yetarlicha chiroyli emas” deb hisoblaydi. U fotosuratlarini ijtimoiy tarmoqqa yuklashdan avval doimo montaj qiladi.
Achinarlisi, Xitoyda Chjou Chun kabi minglab qizlar bor. Ular shunchaki chiroyli bo‘lishni istamaydi, balki majbur ekanliklarini his qiladi, chunki mamlakatda go‘zallik salonlari turli inflyuenserlar orqali keng reklama qilinadi: “Qarang, u qanday o‘zgardi”, “Siz ham uddalay olasiz”, degan so‘zlar har qadamda yangraydi.
Xitoyda plastik jarrohlik bozori alohida sanoatga aylangan. Yiliga 20 milliondan ortiq marta o‘tkaziladigan muolajalarning 80 foizi 25 yoshgacha bo‘lgan yosh qizlarni tashkil qiladi. Klinikalar orasida raqobat juda kuchli.
Chjou hozir 24 yoshda. U vaqtini o‘qish, karyera qurish, sayohat qilishga sarflayotgan bo‘lishi mumkin edi, ammo endilikda operatsiyadan qolgan asoratlarni davolash bilan kun kechirmoqda.
Izoh (0)