Sog‘liqni saqlash vazirligi Respublika ixtisoslashtirilgan xirurgiya ilmiy-amaliy tibbiyot markazida amalga oshirilayotgan transplantatsiya operatsiyalari haqida ma’lumot berdi.
Qayd etilishicha, ayni paytda mamlakatda 3000 nafardan ortiq bemor dasturli dializ muolajasini qabul qiladi. Bu esa bemor holatini biroz qiyinlashtiradi. Ularning 1178 nafari surunkali buyrak yetishmovchiligining terminal bosqichida bo‘lib, transplantatsiya operatsiyasiga muhtoj.
Shu kungacha O‘zbekistonda birgina akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazida yaqin qarindoshlar orasida 711 ta ana shunday murakkab amaliyot o‘tkazilgan.
Transplantatsiya xizmati zamonaviy jarrohlik va umuman tibbiyotni rivojlantirishning istiqbolli yo‘nalishlaridan. Qolaversa, sohaning eng murakkab, o‘ta mas’uliyatli va ayni paytda ehtiyoj ortib borayotgan yo‘nalishlaridan biri ham aynan tana a’zolarini ko‘chirib o‘tkazish amaliyoti hisoblanadi. Biroq bundan 5-6 yil ilgari bu masala juda qiyin edi. Aniqrog‘i, O‘zbekistonda transplantatsiya amaliyotlarining huquqiy asoslari mavjud bo‘lmagan, — deydi mazkur markaz direktori Saidmurod Ismoilov.Markazda jarrohlikning eng murakkab yo‘nalishlari ishlab chiqilishi natijasida o‘tgan 2021-yilning o‘zida 230 ta ana shunday amaliyot bajarilgan. 2022-yilning birinchi 6 oyida esa 143 ta operatsiya muvaffaqiyatli o‘tkazilgan.
Buyrak transplantatsiyasiga bo‘lgan yuqori ehtiyoj tufayli bugungi kunda markazda bunday murakkab amaliyotlar ikki smenada, ya’ni haftasiga 7—8 nafar bemorda bajarilmoqda.
Mavzuga doir:
Izoh (0)