Dunyo va o‘zbek sportiga oid 1-oktabr kunining eng muhim xabarlari dayjesti bilan tanishing.
O‘zbekiston
Chusovitina katta sportga qaytdi
Oksana Chusovitina katta sportga qaytganini ma’lum qildi. Sport gimnastikasi bo‘yicha 3 karra Jahon chempioni va 8 karra Olimpiya o‘yinlari ishtirokchisi o‘zining Instagram sahifasida 2022-yilgi Osiyo o‘yinlariga tayyorgarlik ko‘rishni boshlaganini e’lon qildi.
“Osiyo o‘yinlari—2022 ga tayyorgarlikni boshlashga qaror qildim. Faoliyatimni O‘zbekiston uchun birorta ham medal qo‘lga kiritmay turib yakunlay olmayman”, — deydi Chusovitina.
Eslatib o‘tamiz, 2022-yilgi Osiyo o‘yinlari kelasi yilning sentabr oyida o‘tkaziladi.
Farrux Ikromovning jarrohlik amaliyoti muvaffaqiyatli o‘tdi
O‘zbekiston terma jamoasi futbolchisi Farrux Ikromov Shvetsiyaga qarshi o‘rtoqlik uchrashuvida jarohat olgani va futbolchini davolash uchun Italiyaning mashhur jarrohlaridan biri Paolo Mariani jalb etilgani haqida xabar berilgandi.
O‘FA matbuot xizmatining yozishicha, futbolchi Italiya poytaxti Rimdagi “Villa Styuart” klinikasida professor Mariani tomonidan muvaffaqiyatli operatsiya qilingan va ayni paytda hujumchimiz o‘zini yaxshi his qilmoqda.
Jahon
UEFA musobaqalari tarixiga kirgan Keyn“Tottenhem” hujumchisi Harri Keyn Konferensiyalar Ligasi guruh bosqichi 2-turidan o‘rin olgan “Mura”ga qarshi o‘yinda (5:1) 3 ta gol urdi.
Shu tariqa angliyalik futbolchi musobaqa tarixida het-trik qayd etgan birinchi o‘yinchiga aylandi.
Keyn, shuningdek, UEFAning uchta yirik klub musobaqalarida het-trik qayd etgan uchinchi futbolchi sifatida tarixga kirdi. Ungacha Yupp Haynkes va Gerd Myullerdan bunday natijaga erishgandi.
Azar “Real”da qoladi
“Real” bosh murabbiyi Karlo Anchelotti jamoa yarim himoyachisi Eden Azarni jamoada olib qolmoqchi.
Marca nashriga ko‘ra, mutaxassis Azar jamoaning asosiy futbolchisi bo‘la olishiga ishonadi.
Qarzga botib qolgan “Barselona”
“Barselona” moliyaviy yil yakunlari (2020/21) bo‘yicha hisobot berdi.
Unga ko‘ra, klubning operatsion daromadi budjetdagi 828 millionga nisbatan 631 million yevroni tashkil qilgan. O‘tgan yilga nisbatan pasayish 224 million yevro yoki 26 foizni tashkil etadi.
Xarajatlar o‘tgan mavsumga nisbatan 19 foizga oshgan — 955 million yevrodan 1,136 milliard yevrogacha. Bu klub tarixidagi eng yuqori ko‘rsatkich hisoblanadi.
Bu esa o‘z navbatida “Barselona”ning moliyaviy yil uchun operatsion zararini 505 million yevroga, sof zararni esa 481 million yevroga yetkazgan.
Klubning sof qarzi 2021-yil 30-iyun holatiga ko‘ra 680 million yevroni tashkil qiladi.
“Samoviy maosh” olishni xohlayotgan Holand
“Borussiya D” hujumchisi Erling Holand yangi klubga o‘tgan taqdirda qancha maosh olmoqchi ekanligi ma’lum bo‘ldi.
La Gazzetta dello Sport xabariga ko‘ra, futbolchining agenti Mino Rayola potensial xaridorlardan Holand uchun yiliga 50 million yevro maosh so‘raydi. Shu bilan birga ushbu summa agentlik komissiyasini o‘z ichiga olmagan.
Germaniya terma jamoasining JCh—2022 saralashi doirasidagi oktabr oyida bo‘lib o‘tadigan o‘yinlar uchun qaydnomasi e’lon qilindi.
Hans-Diter Flik qaydnomaga quyidagi futbolchilarni kiritdi.
Darvozabonlar: Bernd Leno, Manuel Noyer, Mark-Andre ter Stegen.
Himoyachilar: Mattias Ginter, Tilo Kerer, Lukas Klostermann, David Raum, Antonio Ryudiger, Niko Shlotterbek, Niklas Zyule.
Yarim himoyachilar va hujumchilar: Karim Adeyemi, Serj Gnabri, Leon Goretska, Kay Haverts, Yonas Hofmann, Yozua Kimmix, Tomas Myuller, Jamol Musiala, Florian Noyhaus, Marko Roys, Leroy Sane, Timo Verner, Florian Virts.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)