Avvallari mashhurlar turli orollar, tadbirkorlik obyektlari yoki ko‘chmas mulklarni sotib olishar edi, endilikda esa ular futbol klublari, “Formula-1” jamoalari va boshqa sport franshizalariga sarmoya kiritmoqda. Ushbu ro‘yxatda sport jamoalariga egalik qiluvchi taniqli shaxslar, ularning qanday qilib bu biznesga kirib kelgani hamda sarmoya miqdori haqida qisqacha ma’lumotlar taqdim etiladi.
Rayan Reynolds — “Wrexham AFC” va “Alpine F1”
2021-yilda aktyor Rayan Reynolds va “Filadelfiyada dimo quyosh” serialining muallifi Rob Makkelxenni “Reksem” futbol klubini 2,6 million dollarga sotib olishdi. Dastlab bu oddiy qiziqishdek tuyulgan bo‘lsa-da, oradan ko‘p o‘tmay ushbu xarid yirik marketing muvaffaqiyatiga aylandi. Reynolds “Welcome to Wrexham” nomli hujjatli serialda ishtirok etdi va bu loyiha tufayli klub butun dunyoda tanildi. Reynolds futbol jamoasining ijtimoiy tarmoqlardagi postlardan tortib stadion ijarasiga oid kelishuvlargacha bo‘lgan barcha faoliyatida bevosita qatnashadi.
2023-yilda u “Formula-1” musobaqalaridagi “Alpine F1” jamoasiga sarmoya kiritdi. Hozirda Makkelxenni va Maykl B. Jordan bilan birgalikda ular jamoaning 24 foizlik ulushiga egalik qilmoqda.
Dryu Keri — “Seattle Sounders”
Teleboshlovchi va komik Dryu Keri mashhurlar orasida sport klubiga sarmoya kiritgan ilk shaxslardan biri hisoblanadi. U 2007-yilda “Seattle Sounders” futbol klubining 7,5 foizlik ulushini sotib oldi. Keri boshqaruvga muxlislarni jalb qilishni taklif qildi va natijada klubda noyob tizim — Sounders Alliance yo‘lga qo‘yildi. Bu orqali muxlislar rahbariyat bo‘yicha ovoz berish huquqiga ega bo‘lishdi. Keri klub o‘yinlarida doimiy qatnashadi va boshqaruv jarayonida faol ishtirok etadi.
Natali Portman — “Angel City FC”
“Oskar” mukofoti sohibasi Natali Portman 2020-yilda Los Anjelesdagi ayollar futbol jamoasi — “Angel City FC” asoschilaridan biriga aylandi. U atrofida Serena Uilyams, Jennifer Garner, Yeva Longoriya, Amerika Ferrera kabi mashhur ayollarni investorlar jamoasi sifatida to‘pladi.
Biroq Portman moliyaviy sarmoyalar bilan cheklanib qolmaydi: u strategik uchrashuvlarda qatnashadi, adolatli ish haqi g‘oyasini ilgari suradi va o‘z platformasidan sportda ayollarning o‘rnini va nufuzini oshirish uchun foydalanadi. Jamoa 2022-yilda debyut qildi va birinchi o‘yin uchun tribunada 22 ming muxlis yig‘ildi.
Lebron Jeyms — “Liverpool FC” va “Boston Red Sox”
Basketbol afsonasi Lebron Jeyms 2011-yilda Angliyaning mashhur “Liverpool” futbol klubining 2 foizlik ulushini sotib oldi. Klub keyinchalik Angliya chempioni va Chempionlar ligasi g‘olibiga aylandi.
2021-yilda esa u “Boston Red Sox” beysbol klubining hamkoriga aylandi. Garchi Jeyms klubning kundalik faoliyatiga aralashmasa-da, uning obro‘-e’tibori Fenway Sports Group (FSG) kompaniyasining xalqaro nufuzini mustahkamlashga xizmat qildi.
Yeva Longoriya — “Angel City FC” va “Necaxa”
Aktrisa Yeva Longoriya ikki klubga sarmoya kiritgan: Los Anjelesdagi “Angel City FC” va Meksikaning “Necaxa” jamoalari. “Necaxa” NFT orqali aksiyalar sotgan ilk klublardan biri bo‘lib, Longoriya bu loyihaga taniqli investor sifatida qo‘shilgan.
Hozrda u FX va Disney+ uchun “Welcome to Necaxa” nomli hujjatli serial ishlab chiqmoqda. Longoriya o‘zining media resurslari orqali ayollar orasidagi sportni targ‘ib qilmoqda va lotin amerikalik sportchilar uchun imkoniyat yaratishga harakat qilmoqda.
Uill Ferrell — LAFC va “Leeds United”
Komik aktyor Uill Ferrell 2016-yilda “LAFC” futbol klubining sherik mulkdoriga aylandi, 2023-yilda esa “Leeds United” klubining aksiyalariga sarmoya kiritdi. Ferrell LAFC o‘yinlarida doimiy qatnashadi, futbolchilar bilan do‘stona muomala qiladi, reklama roliklarida ishtirok etadi.
Mettyu Makkonaxi — “Austin FC”
Aktyor Mettyu Makkonaxi 2019-yilda “Austin FC” futbol klubining ulushlariga ega bo‘ldi. U ham o‘yinlarga doimiy qatnashadi, muxlislar bilan birga baraban chaladi va stadionda xit shiorlar aytadi hamda klub imijini shakllantirishda faol ishtirok etadi.
Maykl B. Jordan — “AFC Bournemouth”
Aktyor Maykl B. Jordan 2022-yilda Angliyaning “AFC Bournemouth” klubining kichik ulushini sotib oldi. U futbol olamiga asta, ammo uzoqni ko‘zlagan sarmoyador sifatida kirib keldi. U klubning brendini rivojlantirish, jamoatchilik bilan aloqalarni yo‘lga qo‘yish va global bozor uchun kontent ishlab chiqishda ishtirok etmoqda. Shuningdek, Jordan “Alpine F1” jamoasining ham aksiyadorlaridan biri hisoblanadi.
Enn Heteuey — “Red Bull Italy SailGP Team”
2025-yilda Enn Heteuey xalqaro SailGP yelkanli musobaqalar ligasida ishtirok etuvchi “Red Bull Italy” jamoasiga sarmoya kiritganini e’lon qildi. Aktrisaga tegishli ulush miqdori oshkor etilmagan. Hozircha SailGP’ning daromadlari unchalik katta emas, ammo u shiddat bilan rivojlanmoqda.
Izoh (0)