Авваллари машҳурлар турли ороллар, тадбиркорлик объектлари ёки кўчмас мулкларни сотиб олишар эди, эндиликда эса улар футбол клублари, “Формула-1” жамоалари ва бошқа спорт франшизаларига сармоя киритмоқда. Ушбу рўйхатда спорт жамоаларига эгалик қилувчи таниқли шахслар, уларнинг қандай қилиб бу бизнесга кириб келгани ҳамда сармоя миқдори ҳақида қисқача маълумотлар тақдим этилади.
Райан Рейнолдс — “Wrexham AFC” ва “Аlpine F1”
2021 йилда актёр Райан Рейнолдс ва “Филаделфияда димо қуёш” сериалининг муаллифи Роб Маккелхенни “Рексем” футбол клубини 2,6 миллион долларга сотиб олишди. Дастлаб бу оддий қизиқишдек туюлган бўлса-да, орадан кўп ўтмай ушбу харид йирик маркетинг муваффақиятига айланди. Рейнолдс “Welcome то Wrexham” номли ҳужжатли сериалда иштирок этди ва бу лойиҳа туфайли клуб бутун дунёда танилди. Рейнолдс футбол жамоасининг ижтимоий тармоқлардаги постлардан тортиб стадион ижарасига оид келишувларгача бўлган барча фаолиятида бевосита қатнашади.
2023 йилда у “Формула-1” мусобақаларидаги “Аlpine F1” жамоасига сармоя киритди. Ҳозирда Маккелхенни ва Майкл Б. Жордан билан биргаликда улар жамоанинг 24 фоизлик улушига эгалик қилмоқда.
Дрю Кери — “Seattlе Sounders”
Телебошловчи ва комик Дрю Кери машҳурлар орасида спорт клубига сармоя киритган илк шахслардан бири ҳисобланади. У 2007 йилда “Seattle Sounders” футбол клубининг 7,5 фоизлик улушини сотиб олди. Кери бошқарувга мухлисларни жалб қилишни таклиф қилди ва натижада клубда ноёб тизим — Sounders Alliance йўлга қўйилди. Бу орқали мухлислар раҳбарият бўйича овоз бериш ҳуқуқига эга бўлишди. Кери клуб ўйинларида доимий қатнашади ва бошқарув жараёнида фаол иштирок этади.
Натали Портман — “Angel City FC”
“Оскар” мукофоти соҳибаси Натали Портман 2020 йилда Лос Анжелесдаги аёллар футбол жамоаси — “Angel City FC” асосчиларидан бирига айланди. У атрофида Серена Уильямс, Женнифер Гарнер, Ева Лонгория, Америка Феррера каби машҳур аёлларни инвесторлар жамоаси сифатида тўплади.
Бироқ Портман молиявий сармоялар билан чекланиб қолмайди: у стратегик учрашувларда қатнашади, адолатли иш ҳақи ғоясини илгари суради ва ўз платформасидан спортда аёлларнинг ўрнини ва нуфузини ошириш учун фойдаланади. Жамоа 2022 йилда дебют қилди ва биринчи ўйин учун трибунада 22 минг мухлис йиғилди.
Леброн Жеймс — “Liverpool FC” ва “Boston Red Sox”
Баскетбол афсонаси Леброн Жеймс 2011 йилда Англиянинг машҳур “Liverpool” футбол клубининг 2 фоизлик улушини сотиб олди. Клуб кейинчалик Англия чемпиони ва Чемпионлар лигаси ғолибига айланди.
2021 йилда эса у “Boston Red Sox” бейсбол клубининг ҳамкорига айланди. Гарчи Жеймс клубнинг кундалик фаолиятига аралашмаса-да, унинг обрў-эътибори Fenway Sports Group (FSG) компаниясининг халқаро нуфузини мустаҳкамлашга хизмат қилди.
Ева Лонгория — “Angel City FC” ва “Necaxa”
Актриса Ева Лонгория икки клубга сармоя киритган: Лос Анжелесдаги “Angel City FC” ва Мексиканинг “Necaxa” жамоалари. “Necaxa” NFT орқали акциялар сотган илк клублардан бири бўлиб, Лонгория бу лойиҳага таниқли инвестор сифатида қўшилган.
Ҳозрда у FX ва Disney+ учун “Welcome to Necaxa” номли ҳужжатли сериал ишлаб чиқмоқда. Лонгория ўзининг медиа ресурслари орқали аёллар орасидаги спортни тарғиб қилмоқда ва лотин америкалик спортчилар учун имконият яратишга ҳаракат қилмоқда.
Уилл Феррелл — LAFC ва “Leeds United”
Комик актёр Уилл Феррелл 2016 йилда “LAFC” футбол клубининг шерик мулкдорига айланди, 2023 йилда эса “Leeds United” клубининг акцияларига сармоя киритди. Феррелл LAFC ўйинларида доимий қатнашади, футболчилар билан дўстона муомала қилади, реклама роликларида иштирок этади.
Меттю Макконахи — “Austin FC”
Актёр Меттю Макконахи 2019 йилда “Austin FC” футбол клубининг улушларига эга бўлди. У ҳам ўйинларга доимий қатнашади, мухлислар билан бирга барабан чалади ва стадионда хит шиорлар айтади ҳамда клуб имижини шакллантиришда фаол иштирок этади.
Майкл Б. Жордан — “AFC Bournemouth”
Актёр Майкл Б. Жордан 2022 йилда Англиянинг “AFC Bournemouth” клубининг кичик улушини сотиб олди. У футбол оламига аста, аммо узоқни кўзлаган сармоядор сифатида кириб келди. У клубнинг брендини ривожлантириш, жамоатчилик билан алоқаларни йўлга қўйиш ва глобал бозор учун контент ишлаб чиқишда иштирок этмоқда. Шунингдек, Жордан “Alpine F1” жамоасининг ҳам акциядорларидан бири ҳисобланади.
Энн Ҳетеуэй — “Red Bull Italy SailGP Team”
2025 йилда Энн Ҳетеуэй халқаро SailGP елканли мусобақалар лигасида иштирок этувчи “Red Bull Italy” жамоасига сармоя киритганини эълон қилди. Актрисага тегишли улуш миқдори ошкор этилмаган. Ҳозирча SailGPʼнинг даромадлари унчалик катта эмас, аммо у шиддат билан ривожланмоқда.
Изоҳ (0)