Taxminan 40 foiz amerikaliklar tadbirkor va milliarder Ilon Mask tashkil etishni taklif qilgan “Amerika” partiyasini qo‘llab-quvvatlashi yoki unga ovoz berishi mumkin. Bu haqda Quantus Insights kompaniyasining so‘rovi natijalari yakunlari bo‘yicha hisobotda ma’lum qilingan.
“Ilon Mask tomonidan ilgari surilgan “Amerika” partiyasi g‘oyasi respondentlarning 40 foizida, ayniqsa, yosh saylovchilar va respublikachi erkaklarda qiziqish uyg‘otdi”, deyiladi bayonotda.
Saylovchilarning 38 foizi bunga qarshi chiqmoqda, yana 22 foizi esa aniq javob bermagan. Ta’kidlanishicha, keksa avlod vakillari va Demokratik partiya tarafdorlari bunday g‘oyaga eng ko‘p shubha bilan qarashmoqda.
“Gap mavjud tizim mamlakatni aslida qanday bo‘lsa yoki bo‘lishni istasa, shunday aks ettira olmasligi haqidagi kuchayib borayotgan tuyg‘u haqida ketmoqda”, deyishadi tadqiqot mualliflari.
So‘rovnoma 30-iyundan 2-iyulgacha bo‘lgan davrda 1 ming nafar AQSH fuqarosi o‘rtasida o‘tkazildi. Tadqiqotning statistik xatoligi 3 foizni tashkil etadi.
“Ruhlantiradi”, deb izoh berdi Mask X ijtimoiy tarmog‘idagi sahifasida.
Iyun oyi oxirida Mask AQSHda yangi siyosiy partiya tuzish masalasini yana ko‘tardi. “Amerika” nomli partiya tuzish g‘oyasi Ilonda AQSH prezidenti Donald Tramp ilgari surayotgan federal xarajatlarni qisqartiruvchi qonun loyihasiga norozilik asosida paydo bo‘lgan.
Izoh (0)