O‘zbekistonliklar Slovakiyaga kuniga 75 yevro to‘lanadigan ishga taklif qilinmoqda. Bu haqda Migratsiya agentligi xabar berdi.
Unga ko‘ra, agentlik hamkorligida Slovakiyaning HUDOS s.r.o. kompaniyasi tomonidan yuk mashinasi haydovchilari uchun bo‘sh ish o‘rinlari e’lon qilinmoqda. Ish turi: CE toifali yuk mashinasi haydovchisi. Oylik maosh to‘liq ishga qabul qilingandan so‘ng kuniga 75 yevro. Bo‘sh ish o‘rinlari soni esa 30 ta.
Nomzodlarga qo‘yiladigan talablar:
- yoshi 20 dan 50 yoshgacha bo‘lgan erkaklar;
- rus va ingliz tillarini yuqori darajada bilish (og‘zaki va yozma);
- har qanday darajadagi ta’lim (boshlang‘ich, o‘rta, oliy);
- O‘zbekiston hududidan chiqishga ruxsati bo‘lishi;
- kamida 1 yillik ish tajribasiga ega bo‘lish;
- mas’uliyatli, sog‘lom va ish faoliyatiga tayyor bo‘lish.
Taklif etilayotgan imtiyozlar:
- viza rasmiylashtirish xarajatlari;
- bonus to‘lovlari va tibbiy sug‘urta;
- bepul turar joy bilan ta’minlash;
- yangi haydovchilar uchun o‘quv kurslari.
Nomzod hisobidan:
- aviachipta (mehnat shartnomasi imzolangandan so‘ng xarajatlar qoplab beriladi);
- ovqatlanish.
Tanlov ikki bosqichda o‘tkaziladi:
- til bilish darajasi bo‘yicha suhbat – O‘zbekistonda;
- amaliy haydash imtihoni – Slovakiyada.
Ma’lumot uchun, Slovakiyaning doimiy aholisi soni 5,5 million kishidan iborat. 2024-yilda mamlakat yalpi ichki mahsuloti 132,9 milliard dollarni tashkil etgan. Bu miqdor aholi jon boshiga qariyb 24 163 dollardan to‘g‘ri keladi.
Taqqoslash uchun, ayni paytda O‘zbekiston aholisi 37,5 million nafardan ortgan. 2024-yilda respublika yalpi ichki mahsuloti hajmi 115 milliard dollarni tashkil etgan. Bu aholi jon boshiga 3063 dollar degani.
2024-yilda O‘zbekistonga xorijiy davlatlardagi mehnat muhojirlari 14,8 milliard dollar pul yuborgan. Bu 2023-yildagidan 3,4 milliard dollarga ko‘p. Mablag‘larning 77 foizi Rossiyadan (11,5 milliard dollar) kelib tushgan. Shu bilan birga, Qozog‘istondan 795 million dollar, AQSHdan 577 million dollar, Janubiy Koreyadan 534 million dollar, Turkiyadan 405 million dollar, Buyuk Britaniyadan 135 million dollar o‘tkazilgan.
Izoh (0)