Qoraqalpog‘iston temir yo‘l chegara bojxona postiga Beyneu–Nukus yo‘nalishidagi yo‘lovchi poyezdining 9-vagonida Qozog‘istondan kirib kelgan fuqaroning qo‘l sumkasi ko‘zdan kechirildi. Bu haqda Qoraqalpog‘iston Respublikasi bojxona boshqarmasi xabar berdi.
Maʼlum bo‘lishicha, ushbu shaxs 6 turdagi 17 dona jami og‘irligi 79,50 gramm bo‘lgan qimmatbaho metall – oltindan yasalgan zargarlik buyumlarini hech qanday hujjatlarsiz olib kelayotgan bo‘lgan.
Qayd etilishicha, ushbu buyumlar bojxona xodimining og‘zaki so‘rovida aytilmagan, bojxona deklaratsiyasida yozib ko‘rsatilmagan va yashirin tarzda olib o‘tishga urinilgan.
Maʼlumot uchun, temir yo‘l orqali harakatlanganda fuqarolar ekvivalenti 500 dollar qiymatidagi tovarlarni O‘zbekiston hududiga bojsiz olib kirishlari mumkin. Qiymati undan ortgan tovarlarga nisbatan bojxona to‘lovlari undirilishi nazarda tutilgan.
Chegarada “sarson bo‘lgan” zargarlik buyumlari
Bojxonachilar yil boshidan buyon salkam 40 kg zargarlik buyumlarining noqonuniy olib o‘tilishiga chek qo‘ydi.
Jumladan, “Toshkent-Aero” ixtisoslashtirilgan bojxona kompleksining Toshkent xalqaro aeroporti chegara bojxona postida zargarlik buyumlarini qonunga xilof tarzda olib kirishga bo‘lgan qator urinishlar fosh qilindi.
Bangkokdan uchib kelgan yo‘lovchilardan biri yuklari orasidagi shirinliklar ichiga qiymati 180 mln so‘mdan oshiq bo‘lgan 121 gramm og‘irlikdagi zargarlik buyumlarini yashirgancha olib kirishga uringan vaqtida to‘xtatib qolindi.
Toshkent—Istanbul reysi bo‘yicha uchib kelgan qo‘shni davlat fuqarosi ham bagajidagi yuklari orasida qiymati 350 mln so‘mlik 370 gramm og‘irlikdagi zargarlik buyumlarini yashirib olib kirayotganida fosh qilindi.
Bokudan kelgan yo‘lovchilar orasida ham qimmatbaho toshlar bilan bezatilgan tilla taqinchoqlarni bojxona nazoratiga taqdim qilmasdan olib o‘tishga uringan shaxs borligi aniqlandi. Qo‘shni davlat fuqarosi bo‘lgan mazkur yo‘lovchi qiymati salkam 130 mln so‘mlik hamda olmos toshlari bilan bezatilgan 74 gramm og‘irlikdagi zargarlik buyumlarini noqonuniy ravishda olib kirishga uringan.
Hozirda yuqoridagi holatlar yuzasidan bojxona tekshiruvlari davom etmoqda.
Raqamlarga ko‘ra, respublika bojxonachilari tomonidan 2025-yilning o‘tgan davri mobaynida aniqlangan 252 ta bojxona qonun buzilishi holatlarida qiymati 24,3 mlrd so‘mlik salkam 40 kg og‘irlikdagi zargarlik buyumlarining bojxona chegaralari olib noqonuniy ravishda olib o‘tilishi va ichki hududdagi yashirin aylanmasiga chek qo‘yilgan.
Shuningdek, Toshkent viloyatida fuqaro jinsiy a’zolari ichida 1 mlrd so‘mlik taqinchoqni yashirincha olib o‘tmoqchi bo‘lgandi. Samarqandda esa fuqaro qadimiy tilla tangalarni Istanbulga yashirincha olib ketmoqchi bo‘lganda ushlangandi.
Izoh (0)