Amerikaning nufuzli ESPN nashri professional boksning barcha vazn toifalari bo‘yicha navbatdagi “pound-for-pound” (P4P) reytingini e’lon qildi. Mazkur ro‘yxat bokschilarning ringdagi natijalari, chempionlik kamarlari, raqiblar darajasi va sportchilarning umumiy ustunligi asosida tuzilgan.
Reytingning yuqori pog‘onasida ukrainalik Oleksandr Usik joylashgan. 38 yoshli bokschi 20-iyul kuni Londonning “Uembli” stadionida britaniyalik Daniel Dyuboani nokautga uchratdi va shu orqali og‘ir vazn toifasida ikkinchi bor mutlaq jahon chempioniga aylandi. Ushbu g‘alaba bilan Usik P4P reytingidagi yetakchiligini mustahkamlab oldi.
Reytingning ikkinchi pog‘onasidan yaponiyalik Naoya Inoue joy oldi. Super yengil vazn toifasining mutlaq chempion ushbu vaznda WBA, WBC, IBF va WBO kamarlarini birlashtirib, mag‘lubiyat nimaligini bilmay kelmoqda (30-0, 27 KO). Inoue navbatdagi jangini 2025-yilning 14-sentyabr kuni o‘zbekistonlik bokschi Murodjon Ahmadaliyevga qarshi o‘tkazadi.
Kuchli uchlikka amerikalik Terens Krouford yakun yasagan. Ikki vazn toifasida to‘rt marta jahon chempioni bo‘lgan Terens o‘zining yengilmas bokschi ekanligini isbotlab kelmoqda. U 2025-yilning 13-sentyabr kuni Saul “Kanelo” Alvaresga qarshi super o‘rta vazn toifasidagi navbatdagi jangini o‘tkazadi. Ushbu bellashuvdagi g‘alaba Krouford uchun navbatdagi chempionlikni taqdim etishi mumkin.
Reytingdagi eng muhim o‘zgarishlardan biri — rossiyalik Artur Beterbiyev kuchli beshlikni tark etdi. Uning o‘rnini esa amerikalik bokschi Jessi Rodriges egalladi. Rodriges 19-iyul kuni o‘tkazilgan jangda janubiy afrikalik Pxumele Kafunini 10-raundda mag‘lubiyatga uchratib, WBC va WBO kamarlarini birlashtirdi. Bu yutuq uni reytingda yuqorilashiga sabab bo‘ldi.
ESPN talqiniga ko‘ra, dunyoning eng yaxshi 10 nafar bokschisi (vazn toifasidan qat’i nazar):
- Oleksandr Usik (Ukraina)
- Naoya Inoue (Yaponiya)
- Terens Krouford (AQSh)
- Dmitriy Bivol (Rossiya)
- Jessi Rodriges (AQSh)
- Artur Beterbiyev (Rossiya)
- Shakur Stivenson (AQSh)
- Saul Alvares (Meksika)
- Devid Benavides (AQSh)
- Dzunto Nakatani (Yaponiya)
Izoh (0)