AQSH aholisining qariyb 53 foizi mashhur amerikalik moliyachi Jeffrey Epshteyn ishi bo‘yicha tergov materiallarining bir qismi AQSHning amaldagi prezidenti Donald Tramp nomi tilga olingani sababli e’lon qilinmayotganiga ishonadi. Bu YouGov tadqiqot xizmati so‘rovi natijalaridan ma’lum bo‘ldi.
Yana 21 foiz amerikaliklar hukumatning Epshteyn ishi bo‘yicha barcha ma’lumotlarni to‘liq oshkor qilishdan bosh tortishi boshqa sabablar bilan bog‘liq deb hisoblaydi. So‘ralganlarning 25 foizi esa bu masalada o‘z fikrini bildira olmagan.
Materiallar aynan Tramp tufayli e’lon qilinmayotganiga asosan AQSH Demokratik partiyasi tarafdorlari va mamlakatning ikki asosiy siyosiy kuchidan birortasini qo‘llab-quvvatlamaydigan mustaqil saylovchilar ishonadi.
“Bu fikrni demokratlarning 84 foizi va mustaqil saylovchilarning 53 foizi qo‘llab-quvvatlaydi. Respublikachilar orasida esa bu fikrni atigi 20 foiz qo‘llab-quvvatlasa, 48 foizi bunga qo‘shilmaydi”, deyiladi nashr e`lon qilgan maqolada.
Shu bilan birga, AQSH aholisining 61 foizi Tramp nomi Epshteyn ishi materiallarida u yoki bu tarzda uchrashiga ishonadi, 12 foizi bunga qo‘shilmaydi, 28 foizi esa javob berishga qiynalgan. Hujjatlarda AQSH prezidenti nomi borligiga demokratlarning 86 foizi, mustaqil saylovchilarning 60 foizi va respublikachilarning 34 foizi ishonadi.
Amerikaliklarning 45 foizi Trampni Epshteyn jinoyatlariga bevosita aloqador deb hisoblaydi, 28 foizi bunday fikrlarni rad etadi, 27 foizi esa aniq fikr bildira olmagan. Bu pozitsiyani asosan demokratlar (77%) va mustaqil saylovchilar (45%) qo‘llab-quvvatlaydi. Respublikachilar partiyasi tarafdorlari orasida bu fikrni atigi 11 foiz qo‘llab-quvvatlaydi.
Shu bilan birga, AQSH aholisining 64 foizi Epshteyn jinoyatlarining barcha gumon qilinayotgan ishtirokchilariga nisbatan puxta va har tomonlama tergov o‘tkazilishiga ishonmaydi va buning natijasida ayrim shaxslar javobgarlikdan qutulishi mumkin deb hisoblaydi.
Respondentlarning 21 foizi bunga qarshi fikrda, 16 foizi esa aniq javob bera olmagan. Tergovning mutlaq xolisligiga nafaqat demokratlar, balki respublikachilar ham shubha bildirgan. Respublikachilarning 57 foizi, demokratlarning 72 foizi va mustaqil saylovchilarning 61 foizi barcha aybdorlar javobgarlikka tortilishiga ishonmaydi.
Izoh (0)