Uzum Market hamkorlar uchun logistika imkoniyatlarini kengaytirishda davom etmoqda. DBS (delivered by seller) ning yangi ish sxemasi sotuvchilarga tovarlarni nafaqat o‘z omborida saqlash, balki Uzum Market marketpleysining logistikasidan foydalanmasdan to‘g‘ridan-to‘g‘ri xaridorlarga yetkazib berish imkonini yaratadi.
2-iyundan boshlab Uzum Market'da marketpleys bilan ishlashning yangi sxemasi — DBS (delivered by seller) ishga tushiriladi, unda marketpleys onlayn vitrina va marketing vositalarini taqdim etadi, sotuvchi esa buyurtmani qayta ishlashning to‘liq jarayonini o‘z zimmasiga oladi: tovarlarni saqlash va qadoqlashdan tortib ularni yakuniy xaridorga yetkazib berishgacha. Bunday ishlash tamoyili o‘z logistika infratuzilmasiga ega bo‘lgan chakana sotuvchilar va yirik brendlarga milliy marketpleysning 10 milliondan ortiq foydalanuvchilariga kirishni saqlab qolgan holda Uzum Market bilan ishlashni optimallashtirish imkonini beradi.
DBS modeli bo‘yicha ishlashda sotuvchilar yetkazib berish zonalari va muddatlarini mustaqil ravishda belgilashlari mumkin bo‘ladi, bundan tashqari, hamkorlardan logistika yig‘imi olinmaydi — faqat platformada tovarlar sotgani uchun komissiya to‘lanadi. Shunday qilib, sotuvchilar ilgari platformada hajm cheklovlari yoki maxsus saqlash va yetkazib berish shartlari tufayli mavjud bo‘lmagan tovarlarni taklif qilish imkoniyatiga ega bo‘ladilar, masalan: yirik o‘lchamli tovarlar, qurilish materiallari, avtomobil akkumulyatorlari, buyurtma asosida tayyorlangan mahsulotlar, zargarlik buyumlari, past aylanmali tor doiradagi tovarlar, premium segmentdagi tovarlar va boshqalar. Bu yangi tor yo‘nalishdagi bizneslar uchun bozorni ochadi va xaridorlar uchun tanlash imkoniyatini kengaytiradi.
— DBS modeli platformamizni rivojlantirishda mantiqiy qadamdir. Biz bilamizki, ko‘plab tadbirkorlarda logistika xususiyatlari tufayli an’anaviy sxemalar bo‘yicha ilgari surish mumkin bo‘lmagan qiziqarli mahsulotlar mavjud. Shu tariqa yanada ko‘proq tadbirkorlar Uzum Market'ning ko‘p millionli auditoriyasiga kirish imkoniyatiga ega bo‘ladilar. Biz har bir sotuvchi — yirik kompaniyadan tortib kichik oilaviy brendgacha o‘z o‘rnini topishi va o‘sishi mumkin bo‘lgan marketpleys yaratmoqdamiz, — deydi Uzum Market bosh direktori o‘rinbosari Akmal Rahimov.
Ushbu model bo‘yicha ishlash haqida batafsil ma’lumotni quyidagi havola orqali olishingiz mumkin: https://seller.uzum.uz/manual/uz/9.dbs/
Bugungi kunda Uzum Market'da butun mamlakat bo‘ylab 15 000 dan ortiq tadbirkor va kompaniyalar o‘z mahsulotlarini sotmoqda. Marketpleysning buyurtma berish punktlari va kuryerlik xizmati O‘zbekiston bo‘ylab 400 dan ortiq aholi punktlarida faoliyat yuritadi.
Sheriklik huquqi asosida
Izoh (0)