Toshkent xalqaro aeroporti bojxonachilari tomonidan yirik qonunbuzilishi holatining oldi olindi. Bu haqda “Toshkent-Aero” ixtisoslashtirilgan bojxona kompleksi xabar berdi.

Maʼlum qilinishicha, Dubay–Toshkent yo‘nalishi bo‘yicha uchib kelgan uch nafar fuqaro belgilangan tartibda bojxona nazoratidan o‘tkazildi.

Natijada fuqarolar tomonidan yashirilgan, bojxona xodimlarining og‘zaki so‘rovida ma‘lum qilinmagan zargarlik buyumlari borligi fosh bo‘ldi.

Aniqlangan zargarlik buyumlarining umumiy og‘irligi 781 grammni, taxminiy hisob-kitoblarga ko‘ra qiymati esa salkam 970 mln so‘mni tashkil etmoqda.

Hozirda ushbu zargarlik buyumlari ashyoviy dalil sifatida saqlovga olinib, holat yuzasidan surishtiruv ishlari olib borilmoqda.

Chegarada “sarson bo‘lgan” zargarlik buyumlari

Bojxonachilar yil boshidan buyon salkam 40 kg zargarlik buyumlarining noqonuniy olib o‘tilishiga chek qo‘ydi. 

Jumladan, “Toshkent-Aero” ixtisoslashtirilgan bojxona kompleksining Toshkent xalqaro aeroporti chegara bojxona postida zargarlik buyumlarini qonunga xilof tarzda olib kirishga bo‘lgan qator urinishlar fosh qilindi.

Bangkokdan uchib kelgan yo‘lovchilardan biri yuklari orasidagi shirinliklar ichiga qiymati 180 mln so‘mdan oshiq bo‘lgan 121 gramm og‘irlikdagi zargarlik buyumlarini yashirgancha olib kirishga uringan vaqtida to‘xtatib qolindi.

Toshkent-Istanbul reysi bo‘yicha uchib kelgan qo‘shni davlat fuqarosi ham bagajidagi yuklari orasida qiymati 350 mln so‘mlik 370 gramm og‘irlikdagi zargarlik buyumlarini yashirib olib kirayotganida fosh qilindi.

Bokudan kelgan yo‘lovchilar orasida ham qimmatbaho toshlar bilan bezatilgan tilla taqinchoqlarni bojxona nazoratiga taqdim qilmasdan olib o‘tishga uringan shaxs borligi aniqlandi. Qo‘shni davlat fuqarosi bo‘lgan mazkur yo‘lovchi qiymati salkam 130 mln so‘mlik hamda olmos toshlari bilan bezatilgan 74 gramm og‘irlikdagi zargarlik buyumlarini noqonuniy ravishda olib kirishga uringan. 

Hozirda yuqoridagi holatlar yuzasidan bojxona tekshiruvlari davom etmoqda.

Raqamlarga ko‘ra, respublika bojxonachilari tomonidan 2025-yilning o‘tgan davri mobaynida aniqlangan 252 ta bojxona qonun buzilishi holatlarida qiymati 24,3 mlrd so‘mlik salkam 40 kg og‘irlikdagi zargarlik buyumlarining bojxona chegaralari olib noqonuniy ravishda olib o‘tilishi va ichki hududdagi yashirin aylanmasiga chek qo‘yilgan. 

Shuningdek, Toshkent viloyatida fuqaro jinsiy a’zolari ichida 1 mlrd so‘mlik taqinchoqni yashirincha olib o‘tmoqchi bo‘lgandi. Samarqandda esa fuqaro qadimiy tilla tangalarni Istanbulga yashirincha olib ketmoqchi bo‘lganda ushlangandi. 

Maʼlumot uchun, jismoniy shaxslar 2025-yilning 20-iyulidan shaxsiy ehtiyoj uchun mo‘ljallangan zargarlik buyumlarini notijorat maqsadlarida respublikaga olib kiriladigan tovarlarning bojsiz olib kirish normalari doirasida olib kirishlari mumkin.

Mazkur norma havo transportida — 1000 dollar, temir yo‘l va daryo transportida — 500 dollar hamda avtomobil (piyoda) o‘tkazish punktlari orqali — 300 dollarni tashkil qiladi.

Olib chiqishda esa jismoniy shaxslarga og‘irligi 200 grammgacha bo‘lgan kumushdan hamda 65 grammgacha bo‘lgan oltin va boshqa qimmatbaho metallardan yasalgan tayyor zargarlik buyumlarini yo‘lovchi bojxona deklaratsiyasini to‘ldirmasdan, ushbu miqdorlardan ortiq bo‘lganlarini yo‘lovchi bojxona deklaratsiyasi asosida bojxona hududidan tashqariga olib chiqishga ruxsat beriladi.