O‘zbek kino san’atida o‘chmas iz qoldirgan bir qator aktrisalar turmush yoki shaxsiy sabablarga ko‘ra san’atdan chekinib, hayotini AQSHda davom ettirmoqda. Ushbu maqolada san’atni tark etib, okean ortida yangi sahifa ochgan mashhur o‘zbek aktrisalari hayoti bilan tanishasiz.
Dilorom Qambarova — O‘zbekistonda xizmat ko‘rsatgan artist
Dilorom Qambarova o‘zining betakror rollari bilan o‘zbek tomoshabinlar qalbidan joy olgan aktrisa hisoblanadi. U “Temir xotin”, “To‘ylar muborak” filmlarida rol ijro etgan. Aktrisa 90-yillarning ikkinchi yarmida san’atdagi faoliyatiga nuqta qo‘yib, Amerika Qo‘shma Shtatlariga ko‘chib ketishga qaror qilgan. U AQSHda bir muddat modalar uyida ishlagan. Bugungi kunda 68 yoshda bo‘lgan Dilorom Qambarova uy bekasi. U ijtimoiy tarmoqlar va omma eʼtiboridan xoli yashashni maʼqul ko‘radi.
Kamola Umarxo‘jayeva
Kamola Umarxo‘jayeva “Sevgi”, “Ayollar saltanati”, “Yodgor” kabi filmlardagi obrazlari bilan tanilgan aktrisa. U 2004-yildan buyon AQSHda istiqomat qiladi. Aktrisa so‘nggi marta 2010-yilda “Qabrdan qaytgan umr” filmida suratga tushgan. Shundan keyin u san’at sohasidagi faoliyatini yakunlagan. Kamola Umarxo‘jayeva 4 nafar farzandning onasi bo‘lib, bugungi kunda oilasi bilan Vashington shahrida yashaydi.
Gulchehra Eshonqulova
“Fotima va Zuhra”, “Panoh”, “Shabnam” va “Janob hech kim” filmlaridagi obrazlari bilan tomoshabinlarga yaxshi tanish bo‘lgan aktrisa. Gulchehra Eshonqulova bundan bir necha yillar avval o‘z faoliyatini yakunlab, oilasi bilan okean ortiga ketgan. Aktrisa AQSHga borgach, o‘z vaqtini til o‘rganish va farzandlari tarbiyasiga bag‘ishladi. 43 yoshda bo‘lgan Gulchehra Eshonqulova hozirda bir o‘g‘il va bir qizning onasi.
Durdona Tursunboyeva
Durdona Tursunboyeva ko‘pchiligimizga “Otalar so‘zi — aqlning ko‘zi” ko‘rsatuvidagi chiqishlari bilan yaxshi tanish bo‘lgan aktrisa. U ham san’atni tark etib, 14 yildan buyon AQSHda yashamoqda. Aktrisa bugungi kunda ikki o‘g‘ilning onasi. U hozirda turmush o‘rtog‘i bilan birga zargarlik buyumlari biznesi bilan shug‘ullanadi.
Gulnora Qosimova
“Qaytar dunyo”, “Iblis devori”, “Mening akam bo‘ydoq”, “Notanish” kabi film va seriallardagi rollari bilan tomoshabinlarga tanish bo‘lgan aktrisa Gulnora Qosimova 2010-yildan buyon Amerika Qo‘shma Shtatlarida yashaydi. Aktrisa intervyularidan birida san’at sohasini tark etmagani, biroq faoliyatida uzoq tanaffus bo‘layotganini taʼkidlagan. U 2013-yilda AQSHda turmushga chiqqan. Bugungi kunda u ikki o‘g‘lining tarbiyasi bilan band.
Izoh (0)