Samarqand viloyatida Istanbulga uchayotgan fuqaro qadimiy tilla tangalarni yashirincha olib ketmoqchi bo‘ldi. Bu haqda Bojxona qo‘mitasi xabar berdi.
Keltirilishicha, Samarqand xalqaro aeroportida bojxona xodimlari Istanbulga parvoz qilayotgan yo‘lovchilardan biri 2 dona qadimiy tilla tangalarni yashirincha olib chiqib ketayotgan vaqtida fosh qilindi.
Tangalar 1923-yilda Turkiya Jumhuriyatida zarb qilingan 100 kurush va 65 kurush ekani aniqlandi. Ularning taxminiy qiymati dastlabki hisob-kitoblarga ko‘ra 15 mln so‘mni tashkil qilmoqda.
Ma’lumot uchun, O‘zbekistondan yaratilganiga 50 yildan oshgan madaniy boyliklar, shu jumladan numizmatika ashyolarini olib chiqish mumkin emas.
Chegaradan noqonuniy tarzda olib o‘tish holatlari ko‘paymoqda
Avvalroq Sirdaryoda 6,7 kilodan ortiq zargarlik buyumlarini chegaradan yashirincha olib o‘tmoqchi bo‘lgan ayol va uning nevarasi qo‘lga tushgan edi.
Sentyabr oyida esa Toshkent xalqaro aeroportida qimmatbaho soatni noqonuniy olib o‘tishga urinish, tarkibida kuchli ta’sir qiluvchi modda bo‘lgan qahvani olib kirish fosh etilgandi.
Iyulda esa Toshkent xalqaro aeroportida fuqaro pnevmatik to‘pponcha olib o‘tmoqchi bo‘lgan edi. Bojxona nazoratiga tegishli tartibda taqdim etilmagan, muqobil manbalarga ko‘ra, taxminiy qiymati 700 ming so‘m bo‘lgan jami 1 dona KR-18 rusumli pnevmatik to‘pponcha va Angry BB nomli og‘irligi 1 kg bo‘lgan sharsimon shakldagi plastik o‘qlar borligi aniqlandi, deyiladi bojxona kompleksi axborotida.
May oyida esa DXX 1,4 kg oltinni O‘zbekistondan noqonuniy olib chiqib ketayotgan shaxslarni ushlagandi.
Izoh (0)