Xorazmda bojxonachilar 1 mlrd so‘mlik tilla taqinchoqlarning noqonuniy aylanmasiga chek qo‘ydi. Bu haqda Bojxona qo‘mitasi matbuot xizmati xabar berdi.
Maʼlum qilinishicha, shubha ostiga olingan shaxs tegishli ruxsatnomasiz tilladan tayyorlangan 5,95 gramm og‘irlikdagi 1 dona uzukni noqonuniy ravishda sotayotgan vaqtida to‘xtatib qolindi.
Mazkur fuqaroga tegishli savdo shoxobchasida hech qanday hujjatlari bo‘lmagan 1 kg dan ziyod og‘irlikdagi zargarlik buyumlari borligi aniqlandi.
Hozirda qiymati dastlabki hisob-kitoblarga 1 mlrd so‘mni tashkil qiluvchi 1 kg dan ziyod og‘irlikdagi zargarlik buyumlari vaqtincha saqlovga olindi.
Hozirda holat yuzasidan tergovga qadar tekshiruv harakatlari olib borilmoqda.
Zargarlik buyumlarining noqonuniy aylanmasi
Raqamlarga ko‘ra, respublika bojxonachilari tomonidan 2025-yilning o‘tgan davri mobaynida aniqlangan 252 ta bojxona qonun buzilishi holatlarida qiymati 24,3 mlrd so‘mlik salkam 40 kg og‘irlikdagi zargarlik buyumlarining bojxona chegaralari olib noqonuniy ravishda olib o‘tilishi va ichki hududdagi yashirin aylanmasiga chek qo‘yilgan.
Maʼlumot uchun, jismoniy shaxslar 2025-yilning 20-iyulidan shaxsiy ehtiyoj uchun mo‘ljallangan zargarlik buyumlarini notijorat maqsadlarida respublikaga olib kiriladigan tovarlarning bojsiz olib kirish normalari doirasida olib kirishlari mumkin.
Mazkur norma havo transportida — 1000 dollar, temir yo‘l va daryo transportida — 500 dollar hamda avtomobil (piyoda) o‘tkazish punktlari orqali — 300 dollarni tashkil qiladi.
Olib chiqishda esa jismoniy shaxslarga og‘irligi 200 grammgacha bo‘lgan kumushdan hamda 65 grammgacha bo‘lgan oltin va boshqa qimmatbaho metallardan yasalgan tayyor zargarlik buyumlarini yo‘lovchi bojxona deklaratsiyasini to‘ldirmasdan, ushbu miqdorlardan ortiq bo‘lganlarini yo‘lovchi bojxona deklaratsiyasi asosida bojxona hududidan tashqariga olib chiqishga ruxsat beriladi.
Izoh (0)