Janubiy Koreyaning sobiq prezidenti Yun Sok Yolning rafiqasi Kim Gon Xi ikkita ilmiy darajasidan mahrum bo‘lmoqda. Bu haqda mahalliy YTN nashri xabar berdi.
Ma’lum qilinishicha, Sunmyon ayollar universiteti mamlakat sobiq prezidenti rafiqasini plagiatda ayblanib, janjal boshlanganidan uch yarim yil o‘tib, uning magistrlik darajasini bekor qilishga qaror qilgan. Shundan so‘ng Kunmin universiteti ham Kimning doktorlik darajasini qaytarib olish tartibini boshlagan.
Kim Gon Xi xonimning magistrlik darajasi bekor qilinganini inobatga olgan holda, biz uning dizayn texnologiyalari maktabida doktorlik dasturida o‘qishni davom ettirish huquqiga ega yoki yo‘qligini, shuningdek, unga doktorlik darajasini berish qonuniy ekanini baholash uchun zarur protsedurani amalga oshirmoqdamiz, dedi maktab vakili.
Koreya oliy ta’lim to‘g‘risidagi qonuniga ko‘ra, doktorlik dasturidan o‘tish uchun magistr darajasiga ega bo‘lish shart hisoblanadi. Sunmyon ayollar universitetida magistrlik darajasining bekor qilinishi Kunmin universiteti tomonidan doktorlik darajasini bekor qilishga asos bo‘ladi.
Hozirda universitet tekshiruv uchun zarur hujjatlarni, jumladan, Sunmyon ayollar universiteti tomonidan magistrlik darajasining bekor qilingani haqidagi rasmiy tasdig‘ni, shuningdek, Janubiy Koreya sobiq birinchi xonimining boshqa tegishli hujjatlar va ishlardan foydalanishga roziligini to‘plamoqda.
Biz bu masalani muhandislik va texnologiyalar maktabi kengashi muhokamasiga rasman kiritamiz, so‘ngra yakuniy qaror qabul qilish va tegishli choralar ko‘rish uchun Kunmin universiteti oliy kengashiga topshiramiz. Voqeaning jiddiyligini hisobga olgan holda, jarayonni tez va aniq o‘tkazish uchun barcha kuchimizni safarbar etamiz, deya ta’kidladi maktab vakili.
Ma’lumot o‘rnida, 2024-yil 13—15-iyun kunlari Janubiy Koreyaning o‘sha paytdagi prezidenti Yun Sok Yol rafiqasi Kim Gon Xi bilan O‘zbekistonga tashrif buyurgandi. Tashrif davomida ikki davlatning do‘stlik va alohida strategik sheriklik munosabatlarini yanada rivojlantirishning dolzarb masalalari ko‘rib chiqilgan.
Savdo, innovatsiyalar va texnologiyalar almashinuvi, energetika, elektronika va elektrotexnika, kimyo sanoati, qishloq xo‘jaligi, infratuzilmaviy rivojlanish va boshqa ustuvor yo‘nalishlarda amaliy hamkorlikni kengaytirish masalalari eʼtibor markazida bo‘lgandi.
Izoh (0)