Uch yillik harbiy xizmatdan so‘ng, BTS guruhi to‘liq tarkibda yana birlashadi. Afsonaviy koreys guruhi bir oy ichida faoliyatini tiklaydi.
Jamoaning yetti a’zosi majburiy harbiy xizmatni yakunlamoqda va butun dunyo bo‘ylab muxlislar ularning qaytishini intiqlik bilan kutmoqda. Bu qaytish esa Janubiy Koreya iqtisodiyotiga katta ta’sir ko‘rsatishi mumkin.
Koreys guruhining 6 a’zosi, jumladan Jin, Jey-Xoup, RM, Vi, Chimin va Chonguk allaqachon harbiy xizmatdan ozod qilingan. Yungi esa iyun oxirida xizmatni tugatadi. Iqtisodchilar fikricha, guruhning qaytishi Janubiy Koreyaga milliardlab dollar keltirishi mumkin. Chunki konsert faoliyati tiklanadi, turizm rivojlanadi, musiqa savdosi ko‘payadi va koreys madaniyatining dunyodagi ta’siri ortadi.
2019-yilda Hyundai Research Institute tahlilchilari BTS yillik iqtisodiyotga 4,65 milliard dollardan ortiq daromad keltirishini hisoblab chiqishgan. Bu esa 500 ming oddiy ishchining umumiy daromadidan ko‘p. Buning barchasi chiptalar, albomlar, reklama, striming, moda va hatto koreys tilini ommalashtirish hisobiga kelgan.
Guruhga qiziqish shunchalik katta ediki, to‘rt a’zoning qaytishi haqida xabar HYBE agentligining aksiyalarini bir kun ichida 7% ga oshirishga sabab bo‘ldi. 2022-yilda Pusanda bo‘lib o‘tgan BTS ning bepul konsertida 50 mingdan ortiq muxlis yig‘ilib, yarim milliard dollardan oshiq iqtisodiy foyda keltirgan.
Hozirda guruhning rasmiy rejalari oshkor qilinmagan, ammo 2025-yil oxiriga yangi albom chiqishi kutilmoqda. Shuningdek, dunyoda eng yirik sayohatlardan biri bo‘lishi mumkin bo‘lgan global tur rejalashtirilmoqda.
Izoh (0)