Жанубий Кореянинг собиқ президенти Юн Сок Ёлнинг рафиқаси Ким Гон Хи иккита илмий даражасидан маҳрум бўлмоқда. Бу ҳақда маҳаллий YTN нашри хабар берди.
Маълум қилинишича, Сунмён аёллар университети мамлакат собиқ президенти рафиқасини плагиатда айбланиб, жанжал бошланганидан уч ярим йил ўтиб, унинг магистрлик даражасини бекор қилишга қарор қилган. Шундан сўнг Кунмин университети ҳам Кимнинг докторлик даражасини қайтариб олиш тартибини бошлаган.
Ким Гон Хи хонимнинг магистрлик даражаси бекор қилинганини инобатга олган ҳолда, биз унинг дизайн технологиялари мактабида докторлик дастурида ўқишни давом эттириш ҳуқуқига эга ёки йўқлигини, шунингдек, унга докторлик даражасини бериш қонуний эканини баҳолаш учун зарур процедурани амалга оширмоқдамиз, деди мактаб вакили.
Корея олий таълим тўғрисидаги қонунига кўра, докторлик дастуридан ўтиш учун магистр даражасига эга бўлиш шарт ҳисобланади. Сунмён аёллар университетида магистрлик даражасининг бекор қилиниши Кунмин университети томонидан докторлик даражасини бекор қилишга асос бўлади.
Ҳозирда университет текширув учун зарур ҳужжатларни, жумладан, Сунмён аёллар университети томонидан магистрлик даражасининг бекор қилингани ҳақидаги расмий тасдиғни, шунингдек, Жанубий Корея собиқ биринчи хонимининг бошқа тегишли ҳужжатлар ва ишлардан фойдаланишга розилигини тўпламоқда.
Биз бу масалани муҳандислик ва технологиялар мактаби кенгаши муҳокамасига расман киритамиз, сўнгра якуний қарор қабул қилиш ва тегишли чоралар кўриш учун Кунмин университети олий кенгашига топширамиз. Воқеанинг жиддийлигини ҳисобга олган ҳолда, жараённи тез ва аниқ ўтказиш учун барча кучимизни сафарбар этамиз, дея таъкидлади мактаб вакили.
Маълумот ўрнида, 2024 йил 13—15 июнь кунлари Жанубий Кореянинг ўша пайтдаги президенти Юн Сок Ёл рафиқаси Ким Гон Хи билан Ўзбекистонга ташриф буюрганди. Ташриф давомида икки давлатнинг дўстлик ва алоҳида стратегик шериклик муносабатларини янада ривожлантиришнинг долзарб масалалари кўриб чиқилган.
Савдо, инновациялар ва технологиялар алмашинуви, энергетика, электроника ва электротехника, кимё саноати, қишлоқ хўжалиги, инфратузилмавий ривожланиш ва бошқа устувор йўналишларда амалий ҳамкорликни кенгайтириш масалалари эътибор марказида бўлганди.
Изоҳ (0)