Abduqodir Husanov Osiyoning eng qimmat 3-futbolchisiga aylandi

Transfermarkt portali iyun oyining boshidan beri futbolchilarning transfer qiymatlarini yangilab bormoqda. Xususan, 30-may kuni Angliya Premyer Ligasi, 3-iyun kuni Fransiya chempionati, 5-iyun kuni Germaniya Bundesligasi, 9-iyun kuni Ispaniya La Ligasi va 17-iyun kuni Italiya A Seriyasi futbolchilari reytingi yangilandi. Shu munosabat bilan Yevropaning top-5 chempionatida to‘p surayotgan osiyolik eng qimmat 10 nafar futbolchining transfer narxidagi o‘zgarishlarga to‘xtalishga qaror qildik.

Angliya Premyer Ligasi

Angliya Premyer Ligasida harakat qilayotgan Abduqodir Husanovning transfer qiymati 35 million yevro bo‘lib, o‘zgarishsiz qoldi. Biroq boshqa futbolchilarning narxida o‘zgarishlar kuzatildi. “Brayton” jamoasining yaponiyalik chap qanot vingeri Kaoru Mitomaning qiymati 5 million yevroga kamaydi va hozirda uning bahosi 40 million yevroga teng. Shuningdek, “Tottenhem” futbolchisi Son Hyon Minning transfer bahosi 10 million yevroga arzonlashib, 20 million yevro etib belgilangan.

Fransiya Liga 1

Fransiya chempionatida to‘p surayotgan Li Kan Inning transfer narxi ham pasaydi. “PSJ” futbolchisi iyun oyidagi yangilanishdan so‘ng 25 million yevroga baholanmoqda. Avvalgi narxi esa 30 million yevro edi.

Germaniya Bundesligasi

Germaniya Bundesligasida to‘p surayotgan Kim Min Jae transfer narxining pasayishiga duch keldi. “Bavariya” himoyachisi va Janubiy Koreya terma jamoasi a’zosi 5 million yevroga arzonlashib, hozirda 40 million yevroga teng baholanmoqda. “Bavariya”ning yana bir yaponiyalik futbolchisi Hiroki Ito ham 5 million yevroga arzonlashgan — uning narxi hozirda 25 million yevroga teng. “Frayburg” jamoasining vingeri Ritsu Doan 3 million yevroga qimmatlashib, uning qiymati 25 million yevroga yetdi. “Mayns” va Yaponiya terma jamoasi yarim himoyachisi Kaishu Sano ham 3 million yevroga oshdi. Uning hozirgi narxi — 20 million yevro.

Ispaniya La Ligasi

Osiyoning eng qimmat 10 futbolchisi orasida La Ligada to‘p surayotgan yagona futbolchi — Takefusa Kubo. Iyun oyidagi yangilanishdan so‘ng “Real Sosyedad” futbolchisining narxi 10 million yevroga kamaydi. Avval 40 million yevro bo‘lgan Kubo hozirda 30 million yevroga baholanmoqda.

Italiya A Seriyasi

Italiya chempionatida ham futbolchilarning transfer qiymatlari yangilandi. O‘zbekiston terma jamoasi va “Roma” klubi hujumchisi Eldor Shomurodovning transfer narxi 1 million yevroga oshib, 5 million yevroga yetdi. “Parma” klubi darvozaboni Zion Suzuki ham Osiyoning eng qimmat 10 futbolchisi qatoriga kirdi. Uning transfer bahosi 6 million yevroga oshib, hozirda 20 million yevroga teng deb baholanmoqda.

Osiyoning eng qimmat 10 futbolchisi:

1. Kaoru Mitomo — “Brayton” 40 mln yevro (oldingi narxi 45 mln yevro)
2. Kim Min Jae — “Bavariya” 40 mln yevro (oldingi narxi 45 mln yevro)
3. Abduqodir Husanov — “Manchester Siti” 35 mln yevro (oldingi narxi 35 mln yevro)
4. Takefusa Kubo — “Real Sosyedad” 30 mln yevro (oldingi narxi 40 mln yevro)
5. Le Kan In — “PSJ” 25 mln yevro (oldingi narxi 30 mln yevro)
6. Ritsu Doan — “Frayburg” 25 mln yevro (oldingi narxi 22 mln yevro)
7. Hiroki Ito — “Bavariya” 25 mln yevro (oldingi narxi 30 mln yevro)
8. Kaishu Sano — “Mayns” 20 mln yevro (oldingi narxi 17 mln yevro)
9. Zion Suzuki — “Parma” 20 mln yevro (oldingi narxi 14 mln yevro)
10. Son Hyon Min — “Tottenhem” 20 mln yevro (oldingi narxi 30 mln yevro).