Hindiston va Kanada 17-iyun kuni ikki davlat poytaxtlarida komissiyalar tashkil etishga kelishib, munosabatlarni qayta tiklash haqida ma’lumot berdi. Bu haqda CNN xabar berdi.
Ottava va Nyu Dehli ikki yildan beri keskin munosabatda edi. Bunga Ottava sikx ayirmachilarining o‘ldirilishida Hindistonni ayblagani sabab bo‘lgan edi. Bu haqda Hindiston bosh vaziri Narendra Modi va mart oyida lavozimga kirishgan Mark Karni Kanadada bo‘lib o‘tgan G7 sammiti doirasidagi uchrashuvdan so‘ng ma’lum qilgan.
“Har ikki mamlakat fuqarolar va biznesni o‘ylagan holda yangi oliy komissarlarni tayinlashga kelishib oldilar”, deyiladi Karni idorasining uchrashuvdan keyingi bayonotida.
Kanadaning sobiq bosh vaziri Jastin Tryudo va Kanadaning boshqa rasmiylari Nyu Dehlini 2023-yilda Vankuver chekkasida taniqli sikx ayirmachisi va Kanada fuqarosi Xardip Singx Nijjarning o‘ldirilishiga aloqadorlikda ochiqchasiga ayblagan edi.
Kanada hukumati bu hodisa haqida Hindiston hukumatiga bildirganini aytgandi. Biroq Hindiston hukumati rasmiylari Kanada dalillarni taqdim etganini bir necha bor rad etib, ayblovlarni “absurd” deb atagan. Hodisa ortidan ikki davlat o‘rtasidagi munosabatlar keskinlashib ketgan. Bu esa diplomatik aloqalarning uzilishi va viza xizmatlarining vaqtincha to‘xtatilishiga sabab bo‘lgan.
Modi Karni bilan bo‘lgan uchrashuvni quyidagicha tasvirlagan: “Hindiston va Kanadani demokratiya, erkinlik va qonun ustuvorligiga bo‘lgan kuchli ishonch bog‘lab turadi. Bosh vazir Karni va men Hindiston—Kanada do‘stligiga turtki berish uchun yaqindan hamkorlik qilishni intiqlik bilan kutamiz”.
Karni bir qator boshqa a’zo bo‘lmagan davlatlar — Braziliya, Janubiy Afrika, Meksika, Ukraina, Avstraliya va Janubiy Koreya rahbarlarini ham bu yilgi G7 sammitida ishtirok etishga taklif qilgandi.
Izoh (0)