“Siyob” dehqon bozori MCHJ direktori o‘rinbosari fuqaroga bozor hududidan joy ajratib berish evaziga 600 dollar olayotgan vaqtida qo‘lga olindi. Bu haqda viloyat IIB matbuot xizmati xabar berdi.
Maʼlum qilinishicha, 17-may kuni Samarqand shahrida tezkor tadbir o‘tkazildi. “Siyob” dehqon bozori MCHJ xodimi 30 yoshli fuqaroga bozor hududidan muzqaymoq ishlab chiqarish apparati joylashtirish uchun uchta joy ajratib berishini va kelgusida rahnamolik qilishini vaʼda qilgan.
Buning evaziga har bir joy uchun 200 dollardan, jami 600 dollar pulni olayotganda ushlandi.
Holat yuzasidan Jinoyat kodeksining 168-moddasi 3-qismi “v” bandi (firibgarlik xizmat mavqeyidan foydalangan holda) bilan jinoyat ishi qo‘zg‘atilib, tergov harakatlari olib borilmoqda.
May oyida kuzatilgan firibgarlik holatlari
Toshkentda 2 kishini hajga jo‘natish uchun salkam 13 ming dollar olgan turfirma xodimlari ushlandi. Xorazm va Andijonda fuqarolarga imtiyozli kredit olib berishni vaʼda qilib, pul olgan shaxslar qo‘lga tushdi. Toshkent shahar Adliya boshqarmasida aloqa operatori va Milliy gvardiyaning Qo‘riqlash boshqarmasi Qarshi shahar bo‘limi xodimiga ham firibgarlik bo‘yicha jinoyat ishi qo‘zg‘atildi. Qashqadaryoda esa 3 nafar advokatning firibgarligi fosh etildi.
Izoh (0)