Давлат кадастрлари палатаси Гурлан тумани филиали бошлиғи ҳамда “Фарғона сув таъминоти” АЖ Марғилон шаҳар филиали оператори пора билан қўлга олинди. Бу ҳақда ИИВ матбуот хизмати хабар берди.
Ўтказилган тезкор тадбирда Давлат кадастрлари палатаси Хоразм вилояти бошқармаси, Гурлан тумани филиали бошлиғи фуқарога нотурар кўчмас мулкни турар-жой тоифасига ўтказишда ижобий хулоса бериш ва вилоят кадастрлар палатасидан ўтказишда ёрдам беришни ваъда қилган.
Бунинг эвазига 500 долларни пора тариқасида олган вақтида ушланди.
Шунингдек, “Фарғона сув таъминоти” АЖ Марғилон шаҳар филиалида аҳоли оператори қўлга олинди. У аслида қарздорлиги бўлмаган, Фарғона шаҳар, Келгели мавзесидаги хонадонни 9 млн 619 минг сўм қарздорлиги мавжудлигини айтган.
Сув ҳисоблагичини алмаштириш ва қарздорлигини йўқотиб бериш эвазига 9 млн сўм олган вақтида ушланди.
Ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
Қарздорликни йўқ қилиб берувчи “уддабурон”лар
Апрель ойида Тошкент шаҳри, Андижон ва Самарқанд вилоятларида қарздорликни йўқ қилиб бериш учун пул олганлар ушланган эди.
Май ойида ҳам Андижон ва Жиззахда газ ва “свет”дан ноқонуний фойдаланиш ҳолатларини расмийлаштирмасликни ваъда қилган шахслар ушланган.
Шунингдек, июль ойида Самарқандда туман электр таъминоти корхонаси собиқ ходими тадбиркорнинг 14 минг долларини қўлга киритмоқчи бўлгани ҳақида хабар берилганди.
Изоҳ (0)