Farg‘ona viloyatida fermer xo‘jaligi rahbarining 5 ming dollarini qo‘lga kiritmoqchi bo‘lgan shaxslar ushlandi, deb xabar berdi Bosh prokuratura huzuridagi departament.
Maʼlum qilinishicha, Katta Farg‘ona magistral kanali boshqarmasi muhandisi U.T. (muqaddam firibgarlik jinoyati uchun sudlangan) va boshqalar Toshloq tumanidagi “H.R.” fermer xo‘jaligi rahbari Sh.K.ning ishonchiga kiradi.
Ular mazkur xo‘jalikning yonida joylashgan kanallar boshqarmasi muhofaza zonasiga kiruvchi 55 sotix yerda kelgusida qurilish ishlarini amalga oshirishi uchun muhofaza hududiga kirmasligi to‘g‘risida xat rasmiylashtirib berishlari evaziga 5 ming dollar olgan vaqtida ushlangan.
Mazkur holat yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
So‘nggi oylarda yerni noqonuniy sotishga urinish holatlari
2025-yil fevralida Farg‘onada fuqaro 2,5 gektar yerni 650 ming dollarga sotishga kelishib, oldindan 100 ming dollarni olgan vaqtida ashyoviy dalillar bilan ushlangandi. Toshkent viloyati Ohangaron tumanida joylashgan va qishloq xo‘jaligiga mo‘ljallangan 32 gektar yerni 2,4 mln dollarga noqonuniy sotmoqchi bo‘lgan shaxs qo‘lga olingandi.
Surxondaryo viloyatida fuqaro qishloq xo‘jaligiga mo‘ljallangan 45 sotix yerni 60 ming dollarga sotishga kelishib, 56,7 ming dollar va 43 million so‘m olgan vaqtida qo‘lga tushgandi. Xorazm viloyatining Urganch tumanida fuqaro davlat zaxirasida bo‘lgan 24 sotix yer maydonini kadastr tizimida ishlovchi tanishlari orqali xaridor nomiga rasmiylashtirib berish evaziga 45 ming dollar va 13 million so‘m olgan vaqtida ushlangandi.
Izoh (0)