O‘zbekistonda fuqarolarni hajga yuborishini aytib firibgarlik qilgan yana to‘rt kishiga jinoyat ishi qo‘zg‘atildi. Bu haqda DXX matbuot xizmati xabar berdi.
Davlat xavfsizlik xizmatining Andijon viloyati bo‘yicha boshqarmasi hamda ichki ishlar organlari hamkorligida o‘tkazilgan tezkor tadbirda, Andijon shahrida yashovchi, 1966-yilda tug‘ilgan, muqaddam bir necha marotaba sudlangan shaxs aldov yo‘li bilan o‘zgalarning ishonchiga kirib, hozirda faoliyat yuritmayotgan Andijon shahridagi turistik firma nomidan 10 nafar fuqaroni hajga yuborishini aytib, evaziga har biri uchun 5 ming dollardan jami 50 ming dollar olgan vaqtida ashyoviy dalillar bilan ushlangan.
Qashqadaryo viloyatida kuzatilgan holatda Qarshi shahrida tadbirkorlik faoliyati bilan shug‘ullanuvchi, 1985-yilda tug‘ilgan shaxs firibgarlik yo‘li bilan fuqaroning ishonchiga kirib, u va uning qarindoshini poytaxtdagi tanishlari orqali hajga yuborish evaziga 14 ming dollar olgan vaqtida ushlandi.
Namangan shahrida qayd etilgan holatda esa mahalliy turistik firmalardan birining menejeri 2 nafar fuqaroni hajga yuborish evaziga 20 ming dollar talab qilib, oldindan 10 ming dollar olgan vaqtida DXX va ichki ishlar organlari tomonidan ushlangan.
Toshkent shahrida faoliyat yurituvchi turistik firma ishchisi Farg‘ona viloyatining Toshloq tumanida yashovchi fuqaroning ishonchiga kirib, uni hajga yuborish evaziga Qo‘qon shahrida 9 ming dollar olgan vaqtida huquqni muhofaza qiluvchi idoralar tomonidan uning noqonuniy harakatiga chek qo‘yilgan.
Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
27-mayda Toshkentda 2 kishini hajga jo‘natish uchun salkam 13 ming dollar olgan turfirma xodimlari ushlangani xabar qilingandi. 15-mayda Toshkentda to‘rt kishini 26 ming dollar evaziga hajga noqonuniy yubormoqchi bo‘lgan turfirma xodimlari ushlangani ma’lum qilindi.
Din ishlari bo‘yicha qo‘mita noqonuniy yo‘llar bilan hajga borish oqibatlari haqida fuqarolarni doimiy ravishda ogohlantirib keladi. Belgilangan tartibga muvofiq haj amallarini bajarish uchun ziyoratchida “Haj-2025” vizasi bo‘lishi shart. Saudiya Arabistoni hukumati qolgan barcha turdagi vizalar — umra, turizm, biznes, ziyorat va boshqalar bilan haj tadbirini amalga oshirishga qatʼiy yo‘l qo‘ymaydi. 2025-yilda O‘zbekistondan 15 259 nafar fuqaro hajga boradi.
Izoh (0)