Toshkent shahrining Bektemir tumanida 12-mart kuni tezkor tadbir o‘tkazildi, deb xabar berdi IIV matbuot xizmati.
Unda 1992-yilda tug‘ilgan, rieltorlik faoliyati bilan shug‘ullanuvchi shaxs qo‘lga olindi. U 1983-yilda tug‘ilgan fuqaroga Toshkent viloyati, Bo‘stonliq tumanidagi 72,6 sotix noturar yer maydonini 1 mln dollarga sotishini aytgan.
Shuningdek, yuqori lavozimda ishlovchi tanishlari orqali 1 oyda ushbu yer maydoni toifasini turar joyga o‘zgartirib, ko‘p qavatli uy-joy qurish uchun ruxsatnomani va barcha hujjatlarni rasmiylashtirib berish evaziga 100 ming dollar talab qilgan.
U avans tariqasida 110 ming dollar olgan vaqtida ushlandi.
Olmazor tumanida o‘tkazilgan tezkor tadbirda esa MIBning qarzdorlik bo‘yicha yuritayotgan ijro hujjatlarini tugatish evaziga katta miqdorda pul talab qilgan shaxs qo‘lga olindi.
U 1972-yilda tug‘ilgan fuqaroning 647 mln so‘m miqdoridagi qarzdorlik bo‘yicha ijro hujjatlarini tugatish va O‘zbekistondan chiqish uchun unga qo‘yilgan taqiqni yechib berish evaziga 25 ming dollar talab qilgan.
U Olmazor tumani, Zarqaynar ko‘chasida 25 dollar olgan vaqtida ushlandi.
Holat bo‘yicha Jinoyat kodeksining 168-moddasi 4-qismi “a” bandi (firibgarlik juda ko‘p miqdorda), 211-moddasi 3-qismi “a” bandi (pora berish juda ko‘p miqdorda) bilan jinoyat ishi qo‘zg‘atilib, gumonlanuvchiga nisbatan qamoq ehtiyot chorasi qo‘llanildi.
So‘nggi oylarda yerni noqonuniy sotishga urinish holatlari
2025-yil fevralida Farg‘onada fuqaro 2,5 gektar yerni 650 ming dollarga sotishga kelishib, oldindan 100 ming dollarni olgan vaqtida ashyoviy dalillar bilan ushlangandi. Toshkent viloyati Ohangaron tumanida joylashgan va qishloq xo‘jaligiga mo‘ljallangan 32 gektar yerni 2,4 mln dollarga noqonuniy sotmoqchi bo‘lgan shaxs ushlangandi. Surxondaryo viloyatida qishloq xo‘jaligiga mo‘ljallangan 45 sotix yerni 60 ming dollarga sotishga kelishib, 56,7 ming dollar va 43 million so‘m olgan vaqtida qo‘lga tushgandi. Xorazm viloyatining Urganch tumanida fuqaro davlat zaxirasida bo‘lgan 24 sotix yer maydonini kadastr tizimida ishlovchi tanishlari orqali xaridor nomiga rasmiylashtirib berish evaziga 45 ming dollar va 13 million so‘m olgan vaqtida ushlangandi.
Izoh (0)