Buyuk Britaniyada TikTok ijtimoiy tarmog‘iga qaram bo‘lib qolgan ayol ish joyidan 500 ming dollar o‘g‘irlab, blogerlarga sovg‘alar sotib olishga sarfladi. Bu haqda Daily Mail xabar beradi.
Ketrin Grinoll ushbu pullarni New Reg Ltd avtomobil kompaniyasida hisobchi bo‘lib ishlagan paytida o‘g‘irlashga muvaffaq bo‘lgan. Moliyaviy tizimlarga kirish imkoniyati tufayli u 121 ta noqonuniy tranzaksiyalarni amalga oshirgan. Umuman olganda, ayol o‘zining shaxsiy hisob raqamlariga taxminan 500 ming dollar o‘tkazgan.
Grinoll pul o‘g‘irlashda qo‘lga tushmaslikka muvaffaq bo‘lgach, u noqonuniy yo‘l bilan topilgan pullarni uy xarid qilish uchun sarflay boshladi. Tez orada ayol mehmonxonalar, sayohatlar va Amazon’dagi xaridlar uchun pul to‘lay boshladi.
Uning eʼtirof etishicha, bu pullarning taxminan 400 ming dollari sevimli tiktokerlarga sovg‘alar uchun sarflangan. Britaniyalik ayolning advokati uning xatti-harakatlari rasman tasdiqlash qiyin bo‘lsa-da “TikTokʼga qaramlik” sabab bo‘lganini aytmoqda.
Kompaniya rahbariyati Grinollning birinchi noqonuniy tranzaksiyasidan bir necha yil o‘tgachgina daromad pasayganini aniqladi. Rahbarlar undan izoh so‘rashdi va u tekshiruv o‘tkazishga vaʼda berdi. Biroq buning o‘rniga ayol 27 ming dollarlik so‘nggi pul o‘tkazmasini amalga oshirdi hamda qarindoshining kasalligini bahona qilib, ofisni tark etdi. Bir hafta o‘tgach, u politsiyaga o‘zini tutib berib, firibgarlik qilganini tan oldi.
Sudning taʼkidlashicha, Grinollning harakatlari 1995-yildan beri mavjud bo‘lgan kompaniyani to‘liq bankrotlikka olib kelishi mumkin edi, bu esa 30 dan ortiq xodimni ishsiz qoldirgan bo‘lardi. Hozirda sud jarayoni davom etmoqda. Qizning muqaddam sudlanmagani va ikki nafar voyaga yetmagan farzandi oldida majburiyatlari borligiga qaramay, britaniyalik ayolga baribir qamoq jazosi tahdid solmoqda, chunki sudyaning so‘zlariga ko‘ra, kompaniyaga “juda katta zarar yetkazilgan”.
Izoh (0)