Saidaziz Saidaliyev (“Saidaziz Medgorodok”) va boshqalarga oid jinoyat ishi 27-noyabr kuni Toshkent shahar sudi jinoyat ishlari bo‘yicha sudlov hayʼati apellyatsiya instansiya sudida ko‘rib chiqildi. Bu haqda Oliy sud matbuot xizmati xabar berdi.
Sud ajrimiga muvofiq jinoyat ishlari bo‘yicha Yunusobod tuman sudining 5-avgustdagi hukmining S.Saidaliyev, A.Akramov, N.Tulyaganov, G‘.O‘rinboyev, U.Maxmudov, A.Nurmatov, D.Badalov, U.Raximov, D.Xoshakov, D.Yunusov, D.Sultanov, B.Samadov, X.Riskiyev va B.Rahmonovga oid qismi o‘zgarishsiz, apellyatsiya protesti va shikoyatlari qanoatlantirilmasdan qoldirildi.
Ushbu ajrimdan norozi taraflar qonunda belgilangan tartib va muddatda Toshkent shahar sudining jinoyat ishlari bo‘yicha sudlov hayʼatiga taftish tartibida shikoyat berishga yoki protest keltirishga haqliligi maʼlum qilindi.
“Saidaziz Medgorodok” ishi
5-avgust kuni Toshkent shahar jinoyat ishlari bo‘yicha Yunusobod tumani sudida “Saidaziz medgorodok” nomi bilan tanilgan Saidaziz Saidaliyev va yana 28 kishiga nisbatan hukm o‘qilgan edi.
Guruhning asosiy a’zosi Saidaziz Saidaliyev Jinoyat kodeksining 165-moddasi 3-qismi “a” va “v” bandi (tovlamachilik), 168-moddasi 4-qismi “a” va “v” bandi (firibgarlik), 211-moddasi 3-qismi “a” va “b” bandi (pora berish), 242-moddasi 1-qismi (jinoiy uyushma tashkil etish), 243-moddasi (jinoiy faoliyatdan olingan daromadlarni legallashtirish), 277-moddasi 2-qismi “b” va “v” bandi (bezorilik), 277-moddasi 3-qismi “a” bandi (bezorilik) bilan aybli deb topildi. Shunga asosan, Saidaliyevga nisbatan 20 yil muddatga ozodlikdan mahrum qilish jazosi tayinlandi. Jazoni umumiy tartibli koloniyada o‘tash belgilandi.
Saidaziz Saidaliyev 1987-yilda Toshkent shahrida tug‘ilgan. U qarzdorlik va boshqa muammolari bo‘lgan shaxslar masalasini qonunni chetlab o‘tgan holda hal qilib berish evaziga moddiy jihatdan manfaatdor bo‘lib kelgan. Fuqarolarga tahdid qilib, pul mablag‘larini noqonuniy qo‘lga kiritgan.
Sud jarayonida sudlanuvchilardan biri Jinoyat kodeksining 168-modda 4-qismi “a” va “v” bandi ya’ni firibgarlikda ayblanayotgan Nuriddin To‘laganov aybsiz deb topilib, sud zalidan ozod qilinishi belgilandi.
Shuningdek, Jinoyat kodeksining 165-modda 3-qismi “v” bandi — tovlamachilik, 182-modda 2-qismi “a” bandi ya’ni “Bojxona to‘g‘risida”gi qonun hujjatlarini buzishda ayblangan Aziz Nurmatovga nisbatan qo‘llanilgan qamoqqa olish tarzidagi ehtiyot chorasi ham bekor qilinib, uning darhol sud zalidan ozod etilishi belgilandi.
Maʼlumotlarga ko‘ra, Saidaziz Saidaliyev va uning sheriklaridan jabrlanganlar soni 30 nafardan ortiq. Ular orasida tadbirkorlar ham bor.
Saidaliyev va boshqalarga oid jinoyat ishi yuzasidan sud jarayoni 2024-yil 11-iyunda boshlangandi.
Izoh (0)