Toshkent shahrida quyma oltinga o‘xshatib tayyorlangan metallarni 70 ming dollarga sotayotgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, muqaddam firibgarlik va boshqa jinoyatlari uchun sudlangan fuqarolar X.U. va A.D. umumiy og‘irligi 2,06 kg bo‘lgan oddiy metallga tilla rangini berish orqali quyma oltinga o‘xshatib tayyorlangan (999,9 asllik belgisi tamg‘asi muhrlangan) metallarni sotmoqchi bo‘lgan.
Ushbu shaxslar o‘zaro til biriktirib M.S va R.L.ga metallarni 70 ming dollarga sotishga kelishgan. Ushbu pullar hisobidan 35 ming dollar olgan vaqtida ushlangan.
Mazkur holat yuzasidan Jinoyat kodeksining 168-moddasi (firibgarlik) va 227-moddasi (hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish) bilan jinoyat ishi qo‘zg‘atilib, tergov harakatlari o‘tkazilmoqda.
2022-yili Samarqand viloyati Paxtachi tumanida 999,9 probali sof oltinni sotmoqchi bo‘lgan shaxslar ushlangandi.
Izoh (0)