O‘zbekistonda may oyida to‘lab berilgan bir martalik nafaqa to‘lovlari haqida ma’lumot berildi. 

Ijtimoiy himoya milliy agentligi tomonidan 2025-yilning may oyida 30 401 nafar fuqaroga bir martalik nafaqa to‘lovlari amalga oshirildi. Umumiy to‘lov miqdori 36,7 milliard so‘mni tashkil etdi.

Jumladan:

• 17 119 nafar fuqaroga 13,9 milliard so‘m miqdorida yangi tug‘ilgan farzand uchun bir martalik suyunchi nafaqasi;
• 13 282 nafar fuqaroga esa 22,8 milliard so‘m miqdorida dafn etish nafaqasi to‘lab berildi.

O‘zbekistonda 1-iyun holatiga ko‘ra, nafaqa oluvchilar soni 719 219 nafarga yetdi.

Bu ko‘rsatkich o‘tgan yilning mos davriga nisbatan 2 397 nafarga (0,33 foiz) ko‘paygan.

Keltirilgan statistik ma’lumotlarga ko‘ra:

• 18 yoshgacha bo‘lgan nogironligi bor bolalar nafaqasi – 171 585 nafar (-242 nafar);
• Nogironlik nafaqasi – 316 941 nafar (+256 nafar);
• Parvarishlash nafaqasi – 74 453 nafar (-365 nafar);
• Yoshga doir nafaqa – 88 950 nafar (+840 nafar);
• Boquvchisini yo‘qotganlik nafaqasi – 57 989 nafar (+375 nafar);
• Yolg‘iz keksa va nogiron shaxslarga moddiy yordam – 7 743 nafar (-25 nafar).

Shu bilan birga, 2025-yildan boshlab Ijtimoiy himoya milliy agentligi tomonidan yetim bolalar va ota-ona qaramog‘idan mahrum bo‘lgan bolalarni oilaga tarbiya (patronat)ga olgan shaxslarga har oylik to‘lovlar hamda bolalarni kiyim-bosh va poyabzal bilan ta’minlash xarajatlarini qoplash tizimi yo‘lga qo‘yildi.

2025-yil 1-iyundan boshlab ushbu to‘lovlar to‘liq raqamlashtirildi, ya’ni barcha to‘lovlar elektron qaydnomalar asosida amalga oshirilmoqda. Parvarishi va ta’minoti uchun to‘lov bilan qamrab olingan shaxslar soni:

• Oila (patronat)ga berilgan bolalar – 940 nafar
• Oilaviy bolalar uylari tutingan bolalari – 618 nafar.

O‘zbekistonda 1,2 million oila moddiy yordam bilan qo‘llab-quvvatlandi. 

Shuningdek, isitish mavsumida tabiiy gaz va elektr quvvatining bazaviy me’yor doirasidagi hamda bazaviy me’yordan oshgan narxlar o‘rtasidagi farq uchun (2024-2025-yil dekabr-aprel) 207 962 nafar oilalarga 23,3 mlrd so‘m kompensatsiya to‘lovlari ajratildi. 

Kompensatsiya va moddiy yordam ajratishda ulushi eng yuqori bo‘lgan hududlar:

• Farg‘ona viloyatida 40,6 mlrd so‘m;
• Qashqadaryo viloyatida 37,3 mlrd so‘m;
• Namangan viloyatida 35,2 mlrd so‘m yordam ajratilgan.

Pensiya jamg‘armasi ro‘yxatidagi pensionerlar soni 4,2 mln nafarga yetdi. 

Lekin bu raqam respublikadagi jami pensionerlar sonini ifodalamaydi. “Daryo” manbasining maʼlum qilishicha, huquqni muhofaza qiluvchi organlar tuzilmalaridan pensiyaga chiqqanlar hisobi va to‘lovlari alohida yuritiladi. U tashkilotlar quyidagilar:

• Prezident davlat xavfsizlik xizmati;
• Davlat xavfsizlik xizmati;
• Mudofaa vazirligi;
• Ichki ishlar vazirligi;
• Bosh prokuraturasi;
• Favqulodda vaziyatlar vazirligi;
• Milliy gvardiyasi;
• Bojxona qo‘mitasi;
• Konstitutsiyaviy sud;
• Oliy sud;
• Sudyalar oliy kengashi.

“Daryo” mazkur tashkilotlardan bir nechtasiga o‘z tuzilmalarida ishlab, pensiyaga chiqqan va hozir pul olayotgan pensionerlar sonini ochiqlashni so‘rab, murojaat qildi. Biroq faqatgina Mudofaa vazirligi tuzilmalarida ishlagan va hozirda pensiya olayotganlar soni oshkor etildi.

“Mudofaa vazirligi tuzilmalarida 27 ming nafar pensioner pensiya olmoqda”, deydi vazirlik Faxriylar kengashi raisi Abubakir Navro‘zov.

Ichki ishlar vazirligi matbuot kotibi Shohruh G‘iyosov esa pensionerlar soni oshkor etilmasligini maʼlum qildi.

“Soni yopiq axborot ekan. Sababi pensiyaga chiqsa, qurolli kuchlar rezerviga o‘tkazilar ekan. U maʼlumot esa maxfiy”, deya javob berdi vazirlik axborot xizmati rahbari.

“Daryo” manbasining aytishicha, huquqni muhofaza qiluvchi organlarda ishlab, pensiyaga chiqadiganlar pensiyalarini hisoblash tartibi jamg‘armanikidan farq qiladi. Yaʼni ularga yuqoriroq pensiya tayinlanadi. 

Milliy statistika qo‘mitasi maʼlumotlariga ko‘ra, 2025-yil 1-aprelda O‘zbekiston aholisi 37,7 million kishiga yetgan.