AQSH prezidenti Donald Tramp ma’muriyati G‘azo sektoridan 1 million falastinlikni Liviyaga ko‘chirish rejasini ishlab chiqmoqda.
Bu haqda NBC telekanali manbalarga tayanib xabar berdi.
Maʼlumotlarga ko‘ra, Vashington Liviya muhojirlarni qabul qilishga rozi bo‘lsa, avvalroq muzlatib qo‘yilgan aktivlarini blokdan chiqarishga vaʼda bermoqda.
Hozircha yakuniy qaror qabul qilingani yo‘q, chunki bu tashabbusni amalga oshirishda jiddiy qiyinchiliklarga duch kelinishi mumkin. Xususan, qancha g‘azolik Liviyaga ixtiyoriy ravishda ketishga rozi bo‘ladi, degan savol ochiqligicha qolmoqda.
AQSH ma’muriyati falastinliklarni moddiy rag‘batlantirish imkoniyatini ko‘rib chiqmoqda, masalan, ularni bepul uy-joy bilan ta’minlash yoki ularga nafaqa to‘lash, ammo bu Vashingtondan jiddiy xarajatlarni talab qiladi.
Shuningdek, falastinliklar Liviyaning qaysi qismiga joylashtirilishi mumkinligi va ularning ko‘chirilishi aniq qanday amalga oshirilishi noma’lum. Bundan tashqari, yana bir million odamning Liviyaga kelishi allaqachon beqaror bo‘lgan mamlakatdagi keskinlikni kuchaytirishi mumkin, deb ta’kidlaydi telekanal.
Izoh (0)