Joriy yil I choragida davlat byudjetidan Pensiya jamg‘armasiga 3,3 trillion so‘m, kam taʼminlangan oilalarga nafaqa va moddiy yordam uchun 4,3 trillion so‘m ajratildi. Bu haqda Iqtisodiyot va moliya vazirligi maʼlumot berdi.
2024-yil yanvar–mart oylarida O‘zbekistonda kam taʼminlangan oilalarga bolalar nafaqasi, moddiy yordam va kompensatsiya to‘lovlari uchun davlat byudjetidan 4,3 trillion so‘m ajratildi. Bunda ijtimoiy nafaqa oluvchi oilalar o‘rtacha soni 1 million 736 mingtani tashkil etdi. Shundan 1 million 677 mingtasi bolalar nafaqasi, 58,9 mingtasi moddiy yordam olgan.
Nafaqa to‘lovlari uchun jami 2 trillion 463 milliard so‘m yo‘naltirilgan. Shundan 2,4 trillion so‘mi kam taʼminlangan oilalarga bolalar nafaqasi, 67,5 milliard so‘mi moddiy yordam to‘lovlari uchun ajratilgan. Birinchi chorakda ijtimoiy nafaqa oluvchi oilalar soni jami oilalarga nisbatan 17,8 foizni tashkil etgan.
Uch oy davomida eng ko‘p bolalar nafaqasi va moddiy yordam olgan kam taʼminlangan oilalar Samarqand viloyati aholisi hissasiga to‘g‘ri kelgan — 311,2 milliard so‘m (2023-yil 1 chorakda 382,1 milliard so‘m bo‘lgan). Eng kami nafaqa va moddiy yordam berilgan oilalar Toshkent shahrida — 43,2 milliard so‘m (2023-yil I chorakda 52,7 milliard so‘m).
Joriy yilning dastlabki uch oyida nogironligi bo‘lgan muhtoj shaxslarga 25 937 dona reabilitatsiya qilishning texnik vositalari uchun 10,1 milliard so‘m to‘lab berildi. Shu bilan birga, 27 nafar uy-joyga muhtoj deb topilgan yetim bolalar va ota-ona qaramog‘idan mahrum bo‘lgan bolalarni uy-joy bilan taʼminlashga 4,2 milliard so‘m ajratildi.
Shu bilan birga:
- Mehnatga layoqatsiz va zarur ish stajiga ega bo‘lmagan fuqarolarga hamda nogironligi bo‘lgan bolalarni parvarishlayotgan onalar nafaqalariga—1,12 trillion so‘m;
- Nogironligi bo‘lgan bolalarga nafaqalariga—410,3 milliard so‘m;
- Bola tug‘ilishi uchun beriladigan nafaqalarga (suyunchi puli) — 152,2 milliard so‘m;
- Dafn marosimi xarajatlarini qoplash uchun— 59,6 milliard so‘m mablag‘lar ajratilgan.
“2024-yilning yanvar–mart oylarida xo‘jalik yurituvchi subyektlarda ishlovchi 3 649 nafar ayollarga Davlat ijtimoiy sug‘urtasi bo‘yicha homiladorlik va tug‘ish nafaqasi to‘lab berilib, korxonalarning 8,6 milliard so‘mlik mablag‘lari o‘z ixtiyorida qoldirildi”, — deyiladi vazirlik hisobotida.
Birinchi chorakda davlat byudjetidan Pensiya jamg‘armasiga 3,3 trillion so‘m o‘tkazib berildi.
Ma’lumot uchun, 2023-yilda fuqarolarning barcha turdagi pensiyalari uchun 53,6 trillion so‘m yo‘naltirilgan. Taqqoslash uchun, 2022-yildagi jami ko‘rsatkich 44,9 trillion so‘mni tashkil etgan. Hozirda mamlakatda pensiya oluvchilar soni 4 million nafarga yaqinlashgan.
Budjet qonunchiligiga ko‘ra, 2024-yilda Pensiya jamg‘armasiga 16 trillion so‘m mablag‘ yo‘naltiriladi (2023-yildagi miqdor 15 trillion so‘m). Prognoz qilinishicha, 2025-yilda jamg‘armaga 19 trillion so‘m, 2026-yilda esa 23 trillion so‘m mablag‘ ajratiladi.
Iqtisodiyot va moliya vazirligi 2023-yil uchun “Fuqarolar uchun byudjet” nashrini ham eʼlon qildi. Unga ko‘ra, o‘tgan yilda ijtimoiy himoya uchun amalga oshirilgan xarajatlar midqori 19,2 trillion so‘mni tashkil etgan. Shundan nafaqalar uchun 12,3 trillion so‘m ajratilgan.
O‘tgan yili ham nafaqa va moddiy yordam mablag‘lari olgan oilalar soni bo‘yicha Samarqand viloyati yetakchilik qilgan. Viloyatda yil davomida 271,8 ming oila bolalar nafaqasi va moddiy yordam pullari olgan. Moddiy yordam pullarini eng kam olgan oilalar Toshkent shahrida qayd etilgan. O‘tgan yilda poytaxtda 32,2 ming oila bolalar nafaqasi va moddiy yordam pullari olgan.
Avvalroq 2024-yil yanvardan O‘zbekistonda bolalar nafaqasi va moddiy yordam oluvchi oilalar soni keskin qisqara boshlagani maʼlum bo‘lgandi. Xususan, yanvarda 1,94 million, fevralda 1,72 million, mart oyida 1,53 millionta oilaga bolalar nafaqasi va moddiy yordam berilgan. Aprelga kelib, 1,34 millionta oila jami 645,5 milliard so‘m bolalar nafaqasi va moddiy yordam pullari olgan. Joriy yil boshidan beri 602,4 mingta oilaga yordam bunday mablag‘lar ajratish to‘xtatilgan.
Eslatib o‘tamiz, joriy yilda davlat byudjetining ish haqi, stipendiya va ijtimoiy nafaqalar uchun xarajatlar miqdori o‘tgan yildagidan 26,6 trillion so‘m ( 2023-yildagi ko‘rsatkich 150,5 trillion so‘m) ko‘p bo‘lishi rejalashtirilgan.
Izoh (0)