“Aholini ijtimoiy himoya qilish tizimini moliyalashtirish tartib-taomillarini takomillashtirish to‘g‘risida”gi prezident farmoni bilan kambag‘al oilalar reyestriga kiritilgan ayrim oilalarga subsidiya ajratiladi.
Farmonga ko‘ra, 2025-yil 1-apreldan “Yoshlar daftari” jamg‘armalari orqali, 2025-yil 1-sentyabrdan esa “Ayollar daftari” jamg‘armalari orqali to‘lanadigan bir martalik moddiy yordamlar o‘rniga kam ta’minlangan oilalar uchun nazarda tutilgan nafaqalar to‘lanadi.
2025-yil 1-maydan “Ijtimoiy daftarlar” jamg‘armalari hisobidan davolash va jarrohlik amaliyotini o‘tkazish xarajatlari Davlat tibbiy sug‘urtasi jamg‘armasi orqali moliyalashtiriladi.
2025-yil 1-apreldan Qoraqalpog‘iston Respublikasi va Xorazm viloyatida muhtoj oilalarga bir marta beriladigan moddiy yordam o‘rniga ushbu hududlarda yashovchi Kambag‘al oilalar reyestriga kiritilgan oilalarga uy-joyida artezian quduq qazish, suv nasoslarini o‘rnatish hamda ichimlik suv filtrlarini xarid qilish xarajatlarini qoplash uchun subsidiya ajratish tartibi joriy etiladi.
Bunda subsidiya xarajatlarning 90 foizi, biroq BHMning 30 baravaridan (11 million 250 ming so‘m) ko‘p bo‘lmagan miqdorda ajratiladi.
2025-yil 1-maydan ozodlikdan mahrum etish joylaridan ozod qilingan shaxslarga BHMning 6 baravari miqdoridagi bir martalik nafaqa puli “Inson” ijtimoiy xizmatlar markazlari orqali to‘lanadi.
Tuman (shahar) hokimliklari huzurida “Infratuzilma va ijtimoiy barqarorlik” jamg‘armalari tashkil etiladi.
O‘zbekistonda kambag‘allikni qisqartirish
Shavkat Mirziyoyev mahallalarda kambag‘allikni qisqartirish, kambag‘al oilalar bilan ishlash tizimini yangi bosqichga olib chiqish chora-tadbirlari yuzasidan 2024-yilning sentyabrida o‘tkazgan videoselektor yig‘ilishida O‘zbekistonda kambag‘allikni qisqartirish umummilliy harakatga aylanishini, “Kambag‘allikdan farovonlik sari” dasturi tayyorlanayotganini aytgandi. Dastur shu yilning o‘zida 500 ming, 2025-yilda yana 1 million kishini kambag‘allikdan chiqarishga qaratilgan.
O‘zbekistonda kambag‘allik chegarasi 669 ming so‘m etib belgilandi. Statistika agentligiga ko‘ra, 2025-yil uchun hisoblangan minimal isteʼmol xarajatlari qiymati bir oyda kishi boshiga shunchani tashkil etdi.
Kambag‘allikni qisqartirish va bandlik vazirligi bergan ma’lumotga ko‘ra, O‘zbekistonda kambag‘allik darajasi 2024-yil yakuniga ko‘ra 11 foizdan 8,9 foizga kamaydi.
Izoh (0)