Ўзбекистонда май ойида тўлаб берилган бир марталик нафақа тўловлари ҳақида маълумот берилди. 

Ижтимоий ҳимоя миллий агентлиги томонидан 2025 йилнинг май ойида 30 401 нафар фуқарога бир марталик нафақа тўловлари амалга оширилди. Умумий тўлов миқдори 36,7 миллиард сўмни ташкил этди.

Жумладан:

• 17 119 нафар фуқарога 13,9 миллиард сўм миқдорида янги туғилган фарзанд учун бир марталик суюнчи нафақаси;
• 13 282 нафар фуқарога эса 22,8 миллиард сўм миқдорида дафн этиш нафақаси тўлаб берилди.

Ўзбекистонда 1 июнь ҳолатига кўра, нафақа олувчилар сони 719 219 нафарга етди.

Бу кўрсаткич ўтган йилнинг мос даврига нисбатан 2 397 нафарга (0,33 фоиз) кўпайган.

Келтирилган статистик маълумотларга кўра:

• 18 ёшгача бўлган ногиронлиги бор болалар нафақаси – 171 585 нафар (-242 нафар);
• Ногиронлик нафақаси – 316 941 нафар (+256 нафар);
• Парваришлаш нафақаси – 74 453 нафар (-365 нафар);
• Ёшга доир нафақа – 88 950 нафар (+840 нафар);
• Боқувчисини йўқотганлик нафақаси – 57 989 нафар (+375 нафар);
• Ёлғиз кекса ва ногирон шахсларга моддий ёрдам – 7 743 нафар (-25 нафар).

Шу билан бирга, 2025 йилдан бошлаб Ижтимоий ҳимоя миллий агентлиги томонидан етим болалар ва ота-она қарамоғидан маҳрум бўлган болаларни оилага тарбия (патронат)га олган шахсларга ҳар ойлик тўловлар ҳамда болаларни кийим-бош ва пойабзал билан таъминлаш харажатларини қоплаш тизими йўлга қўйилди.

2025 йил 1 июндан бошлаб ушбу тўловлар тўлиқ рақамлаштирилди, яъни барча тўловлар электрон қайдномалар асосида амалга оширилмоқда. Парвариши ва таъминоти учун тўлов билан қамраб олинган шахслар сони:

• Оила (патронат)га берилган болалар – 940 нафар
• Оилавий болалар уйлари тутинган болалари – 618 нафар.

Ўзбекистонда 1,2 миллион оила моддий ёрдам билан қўллаб-қувватланди. 

Шунингдек, иситиш мавсумида табиий газ ва электр қувватининг базавий меъёр доирасидаги ҳамда базавий меъёрдан ошган нархлар ўртасидаги фарқ учун (2024-2025 йил декабрь апрель) 207 962 нафар оилаларга 23,3 млрд сўм компенсация тўловлари ажратилди. 

Компенсация ва моддий ёрдам ажратишда улуши энг юқори бўлган ҳудудлар:

• Фарғона вилоятида 40,6 млрд сўм;
• Қашқадарё вилоятида 37,3 млрд сўм;
• Наманган вилоятида 35,2 млрд сўм ёрдам ажратилган.

Пенсия жамғармаси рўйхатидаги пенсионерлар сони 4,2 млн нафарга етди. 

Лекин бу рақам республикадаги жами пенсионерлар сонини ифодаламайди. “Дарё” манбасининг маълум қилишича, ҳуқуқни муҳофаза қилувчи органлар тузилмаларидан пенсияга чиққанлар ҳисоби ва тўловлари алоҳида юритилади. У ташкилотлар қуйидагилар:

• Президент давлат хавфсизлик хизмати;
• Давлат хавфсизлик хизмати;
• Мудофаа вазирлиги;
• Ички ишлар вазирлиги;
• Бош прокуратураси;
• Фавқулодда вазиятлар вазирлиги;
• Миллий гвардияси;
• Божхона қўмитаси;
• Конституциявий суд;
• Олий суд;
• Судьялар олий кенгаши.

“Дарё” мазкур ташкилотлардан бир нечтасига ўз тузилмаларида ишлаб, пенсияга чиққан ва ҳозир пул олаётган пенсионерлар сонини очиқлашни сўраб, мурожаат қилди. Бироқ фақатгина Мудофаа вазирлиги тузилмаларида ишлаган ва ҳозирда пенсия олаётганлар сони ошкор этилди.

“Мудофаа вазирлиги тузилмаларида 27 минг нафар пенсионер пенсия олмоқда”, дейди вазирлик Фахрийлар кенгаши раиси Абубакир Наврўзов.

Ички ишлар вазирлиги матбуот котиби Шоҳруҳ Ғиёсов эса пенсионерлар сони ошкор этилмаслигини маълум қилди.

“Сони ёпиқ ахборот экан. Сабаби пенсияга чиқса, қуролли кучлар резервига ўтказилар экан. У маълумот эса махфий”, дея жавоб берди вазирлик ахборот хизмати раҳбари.

“Дарё” манбасининг айтишича, ҳуқуқни муҳофаза қилувчи органларда ишлаб, пенсияга чиқадиганлар пенсияларини ҳисоблаш тартиби жамғарманикидан фарқ қилади. Яъни уларга юқорироқ пенсия тайинланади. 

Миллий статистика қўмитаси маълумотларига кўра, 2025 йил 1 апрелда Ўзбекистон аҳолиси 37,7 миллион кишига етган.