Monako malikasi Sharlen davlat byudjetini isrof qilishda ayblanmoqda. Knyaz Alber II ning sobiq xazinachisi Klod Palmero qirollik oilasining barcha moliyaviy ishlari haqida batafsil ma’lumot beruvchi yozuvlarini oshkor qildi. Bu yozuvlar bilan The Wall Street Journal jurnalistlari tanishish imkoniyatiga ega bo‘lishdi.
Nashrning xabar berishicha, Sharlen so‘nggi 8 yil ichida davlat xazinasidan taxminan 17 million dollar sarflagan. Rasmiy ma’lumotlarga ko‘ra esa Monakoning xarajatlar ro‘yxatida uning ta’minoti taxminan 8,5 million dollarga tushishi kerak edi.
Xabarlarga ko‘ra, mablag‘lar monarxning turli kongilxushliklariga sarflangan. Masalan, u o‘z idorasini ta’mirlash uchun 1 million ajratgan, 2016-yilda bir kunda noma’lum ehtiyojlar uchun 66 ming dollar sarflagan, 2017-yilda esa Alber hatto ortiqcha sarflangan 800 ming yevroni qoplashga majbur bo‘lgan.
Fosh etuvchi hujjatlarda qirollik oilasi o‘zlariga 795 ming dollar o‘tkazgani haqida ma’lumotlar mavjud bo‘lib, bu xarajatlar uchun hech qanday maqsad ko‘rsatilmagan. Bu maxfiylik bilan bog‘liqligi aytilgan. Ko‘pchilik bu mablag‘ Sharlenning o‘zi uchun yoki Albertning o‘zi yashaydigan shaxsiy kvartirasi uchun ishlatilgan bo‘lishi mumkin deb taxmin qilmoqda. Taxminlarga ko‘ra, er-xotin uzoq vaqtdan beri jiddiy muammolarga duch kelgan, shu sababli ular birga yashamaydi.
O‘tgan yili Palmeroning to‘plagan arxivlari Le Monde nashrini qiziqtirib qoldi. Ular xazinabonning yozuvlarini o‘rganib chiqib, malikaning ta’mirlashdan tashqari, boshqa moliyaviy ortiqcha xarajatlarga ham yo‘l qo‘yganini ma’lum qildi. Masalan, u Albert bilan rasmiy nikohdan oldin ham kelajakdagi turmush o‘rtog‘ini yiliga 1,5 million dollar nafaqa tayinlashga, shuningdek, 700 ming dollarlik bir martalik pul o‘tkazmasini amalga oshirishga majbur qilgan.
Nashr ma’lumotlariga ko‘ra, malika o‘zi bilan 8 kishi ishlayotganiga qaramay, xodimlar sonini ko‘paytirishni talab qilgan. Bu qanchaga tushgani haqida faqat taxmin qilish mumkin. Biroq ma’lum bo‘lishicha, Sharlen faqat shaxsiy oshpaziga kuniga 300 yevrodan maosh to‘lagan.
Shuningdek, sobiq xazinachi malikaning akasi Shon uchun 300 ming yevrolik uchta to‘lovni imzolashga majbur bo‘lganini aytdi. Yozuvlarda ko‘rsatilishicha, bu mablag‘lar uning uy-joyini ta’mirlashga sarflanishi kerak edi.
Eslatib o‘tamiz, bu tafsilotlarning barchasi Monakodagi korrupsiyaga bag‘ishlangan anonim veb-saytda e’lon qilingan bir qator fosh etishlardan so‘ng jamoatchilikka ma’lum bo‘ldi. Janjal shu qadar katta tus oldiki, knyaz Albert butun xodimlar apparatini tarqatib yubordi. U, jumladan, yigirma yildan ortiq xazinachi lavozimida ishlagan Klod Palmeroni ham ishdan bo‘shatdi. Palmero hozirgi monarxning otasi Rene III davridan boshlab ishlagan va uzoq yillar davomida saroy sirlarini saqlab kelgan. Iste’foga chiqqandan so‘ng Palmero arxivlarni o‘zi bilan olib ketdi va endi Monako qirollik oilasiga qarshi ko‘rsatmalarda o‘z daftarlaridagi ma’lumotlarni oshkor qilmoqda.
Izoh (0)