O‘zbekistonda 2024-yilda Davlat ijtimoiy sug‘urta jamg‘armasidan xususiy sektorda band bo‘lgan ayollarga to‘lab berilgan homiladorlik va tug‘ish nafaqasi bo‘yicha ma’lumot berildi.
Nafaqa oluvchi byudjet tashkilotlaridan tashqari barcha yuridik shaxsda va yakka tartibdagi tadbirkorda mehnat shartnomasiga asosan oxirgi 6 oy davomida uzluksiz ish stajiga ega bo‘lgan ayol hisoblanadi.
Iqtisodiyot va moliya vazirligi xabariga ko‘ra, o‘tgan yil davomida 15 ming 178 nafar fuqaroga 38,1 milliard so‘m nafaqa pullari to‘langan. Ko‘rsatkich 2023 yilda 33,1 milliard so‘mni tashkil etgan. Nafaqa miqdori 2 million 592 ming so‘m, minimal iste’mol xarajatlarining to‘rt baravarini tashkil etgan.
Nafaqa oluvchilarning eng ko‘pi Toshkent shahrida joylashgan — 3 481 nafar ayol. Ularga jami 8 milliard 737 million so‘m to‘langan (respublika bo‘yicha ulushi 22,9 foiz). Undan keyingi o‘rinlarni 3 412 nafar ayol bilan Toshkent viloyati (8 milliard 576 million so‘m) va 1 374 ko‘rsatkich bilan Farg‘ona viloyati egallagan (3 milliard 546 million so‘m).
Avvalroq Iqtisodiyot va moliya vazirligi 2025-yil uchun davlat byudjeti loyihasini eʼlon qilgandi. Bu yil byudjetdan nafaqalar, moddiy yordam va kompensatsiya to‘lovlari uchun jami 17,3 trillion so‘m ajratish rejalashtirilgan.
2025-yilda Ijtimoiy himoya milliy agentligig respublika budjetidan 21,1 trillion so‘m mablag‘ yo‘naltirish prognoz qilingan. Agentlik mablag‘larni quyidagicha taqsimlaydi:
- kam taʼminlangan oilalarga bolalar nafaqalari va moddiy yordamlarga — 7,3 trillion so‘m;
- mehnatga layoqatsiz va zarur ish stajiga ega bo‘lmagan fuqarolar nafaqalariga — 5,6 trillion so‘m;
- nogironligi bo‘lgan bolalarni parvarishlayotgan onalar nafaqalariga — 2 trillion so‘m;
- bola tug‘ilishi uchun beriladigan nafaqalar (suyunchi puli)ni to‘lash uchun — 275 milliard so‘m;
- dafn marosimi xarajatlarini qoplash uchun — 271,3 milliard so‘m;
- yetim bolalar va ota-ona qaramog‘idan mahrum bo‘lgan bolalarni uy–joy bilan taʼminlash uchun —140 milliard so‘m;
- muhtoj shaxslarni protez–ortopediya moslamalari va reabilitatsiya qilishning texnik vositalari bilan taʼminlash xarajatlariga — 70 milliard so‘m;
- Qoraqalpog‘iston Respublikasi va Xorazm viloyatidagi muxtoj oilalarga bir marta beriladigan moddiy yordam to‘lash xarajatlariga — 22,6 milliard so‘m.
Izoh (0)