Toshkent viloyatining Yangiyo‘l tumanida fuqarolar ijtimoiy kartadan foydalanishni boshlagani xabar qilingandi. Ijtimoiy himoya milliy agentligi ushbu kartaga oid savollar va ma’lumotlar ko‘payib borayotganini inobatga olib, eng muhimlarini aniqlashtirib o‘tdi.
Ijtimoiy karta tajriba-sinov bosqichida Toshkent shahri va Toshkent viloyatining Yangiyo‘l tumanida joriy etildi.
Bunda, ijtimoiy karta 2024-yilning dekabr oyidan boshlab yangi tayinlangan 9 turdagi ijtimoiy to‘lovlar oluvchi shaxslarga taqdim etilmoqda. Ushbu shaxslarga ijtimoiy kartalar bepul beriladi va dastlab to‘lov vositasi (bank kartasi) funksiyasini bajaradi.
2024-yil 1-dekabrdan boshlab quyidagi to‘lovlar ijtimoiy karta orqali to‘lab berilmoqda:
- kam ta’minlangan oilalarga bolalar nafaqasi;
- kam ta’minlangan oilalarga moddiy yordam;
- yoshga doir nafaqa;
- nogironlik nafaqasi;
- yolg‘iz keksalar va nogironligi bo‘lgan shaxslar uchun har oylik moddiy yordam;
- nogironligi bo‘lgan 18 yoshgacha bolalarga nogironlik nafaqalari;
- nogironligi bo‘lgan bolalarni parvarishlayotgan onalar uchun nafaqa;
- protez-ortopediya buyumlari va reabilitatsiya qilishning texnik vositalari xaridi uchun vaucher;
- boquvchisini yo‘qotganlik nafaqasi.
2025-yil 1-apreldan boshlab ushbu hududlar (Toshkent shahri va Toshkent viloyatining Yangiyo‘l tumanida) bo‘yicha yana qo‘shimcha 2 turdagi ijtimoiy to‘lovlar, ya’ni homiladorlik va tug‘ish nafaqasi hamda “Saxovat va ko‘mak”, “Ayollar daftari” va “Yoshlar daftari” jamg‘armalari hisobidan to‘lanadigan bir martalik moddiy yordamlar ijtimoiy karta orqali to‘lab beriladi.
Ijtimoiy karta quyidagi toifadagi shaxslarga bepul beriladi:
- Kambag‘al oilalar reyestriga kiritilgan oilalar (shaxslar);
- “Ijtimoiy himoya yagona reyestri” axborot tizimi orqali kam taʼminlangan deb eʼtirof etilgan oilalar;
- ko‘p bolali oilalarning aʼzolari;
- nogironligi bo‘lgan shaxslar;
- o‘zgalar parvarishiga muhtoj shaxslar bo‘lgan yolg‘iz yashovchi va yolg‘iz keksalar;
- o‘zgalar parvarishiga muhtoj shaxslar parvarishi bilan band bo‘lgan shaxslar;
- yetim bolalar va ota-ona qaramog‘idan mahrum bo‘lgan bolalar;
- vasiylar (homiylar), tutingan ota-onalar;
- muomalaga layoqatsiz shaxslar;
- muomala layoqati cheklangan shaxslar;
- muomalaga layoqatsiz va muomala layoqati cheklangan shaxslarning qonuniy vakillari;
- pensionerlar;
- davlat byudjeti mablag‘lari hisobidan stipendiya to‘lanayotgan talabalar;
- davlat byudjeti mablag‘lari hisobidan stipendiya to‘lanayotgan o‘quvchilar (tinglovchilar);
- shahar yo‘lovchi transportidan (taksidan tashqari) bepul foydalanish huquqiga ega bo‘lgan shaxslarga.
Ijtimoiy karta funksiyalari bosqichma-bosqich kengaytirib boriladi
2025-yilning 1-aprelidan boshlab transport kartasi va imtiyozli transport kartasi funksiyalarini ham bajaradi. Yaʼni jamoat transportida imtiyozli yoki bepul foydalanish huquqiga ega bo‘lgan shaxslar, belgilangan imtiyozli yoki bepul tarifdan foydalangan holda, imtiyozga ega bo‘lmagan shaxslar umumbelgilangan transport tariflarida transportdan foydalanishlari mumkin bo‘ladi.
Ushbu funksiyani joriy etish maqsadida tegishli axborot tizimlarini integratsiya qilish bo‘yicha ishlar amalga oshirilmoqda.
Ijtimoiy karta ariza berilgan kundan boshlab 3 ish kuni ichida taqdim etiladi. O‘zgalar parvarishiga muhtoj ayrim shaxslarga “Inson” ijtimoiy xizmatlari markazlari tomonidan 15 kun ichida ijtimoiy kartalar ularning yashash joyiga yetkazib beriladi.
Ijtimoiy karta 2025-yil 1-iyuldan boshlab bosqichma-bosqich respublikaning barcha hududlariga joriy etiladi.
O‘zbekistonda ijtimoiy karta tizimi joriy etilishi haqida 2024-yil iyulida Shavkat Mirziyoyevga taqdim qilingan ijtimoiy himoya sohasidagi qo‘shimcha chora-tadbirlar taqdimotida ma’lum qilingandi. Bu tartib dastlab Toshkent shahri va Yangiyo‘l tumanida, keyingi yildan boshqa hududlarda joriy etilishi belgilangandi.
Prezident 2024-yil dekabrida o‘tkazilgan videoselektor yig‘ilishida hozirgi kunda 65 turdagi ijtimoiy xizmat va yordam olish uchun fuqarolarimiz tug‘ilganlik, nogironlik to‘g‘risida, pensiya, talabalik guvohnomasi, bank kartasi kabi 10 dan ortiq hujjatni ko‘tarib yurishga majburligini, bunday ovoragarchilikka chek qo‘yish vaqti kelganini taʼkidlagandi.
Ijtimoiy karta bir vaqtning o‘zida ham to‘lov vositasi, ham ehtiyojmand toifaga mansublik tasdig‘i hisoblanadi. Bu orqali qog‘oz shaklidagi hujjatlar bekor qilinib, vaqt va mablag‘ tejaladi. 72 turdagi ijtimoiy xizmatlar, 76 turdagi yordamlar va 200 ga yaqin imtiyozlar yagona elektron tizimga umumlashtiriladi.
Izoh (0)