Respublikada iyun oyi uchun 4 million kishiga pensiya, 1,2 millionta oilaga nafaqa mablag‘lari to‘lab berildi.
2024-yil iyun oyi uchun 1 million 207 mingta kam taʼminlangan oilalarga 596 milliard 853 million so‘m miqdoridagi mablag‘lar “Xalq banki”ga to‘lab berildi. Bu haqda Ijtimoiy himoya milliy agentligi xabar qildi.
Kam taʼminlangan oila sifatida nafaqa oluvchi 1 million 118 mingta oilalarga (92,6 foiz) bank kartalari orqali to‘lovlar amalga oshiriladi. Amaldagi qonunchilik talablariga muvofiq, nafaqa pullarini naqd shaklda oluvchi oilalarga joriy oy to‘lovlari “Xalq banki”ning sayyor kassalari tomonidan oyning 27-sanasigacha yetkazib beriladi,—deyiladi agentlik xabarida.
Taqqoslash uchun, aprel oyida respublikada 1,34 millionta kam taʼminlangan oilalarga 645,5 milliard so‘m mablag‘ to‘langandi. 2023-yilda esa 2,2 million oilaga jami 12,3 trillion so‘m bolalar nafaqasi va moddiy yordam pullari to‘lab berilgan.
Qayd etilishicha, iyun oyida 143,8 mingta kam taʼminlangan oilalar “Ijtimoiy himoya yagona reyestri” axborot tizimiga kiritilgan. Shundan 135 ming 822 tasiga bolalar nafaqasi, 7 ming 976 tasiga moddiy yordam tayinlangan.
Iyun oyida pensiya pullarini naqdsiz shaklda oluvchilarga ham mablag‘lar to‘liq moliyalashtirildi.
“Iyun oyi to‘lov ro‘yxatlariga kiritilgan 4 million nafar pensiya oluvchilar uchun talab etilgan mablag‘lar tijorat banklariga moliyalashtirilib berildi”, —deya xabar berdi Pensiya jamg‘armasi.
Qo‘shimcha qilinishicha, pensiya to‘lovlarini naqd pulsiz shaklda oluvchi 3,1 million nafar (77 foiz) fuqarolar bank kartalariga mablag‘lar to‘liq o‘tkazilgan.
2024-yil 1-iyun holatiga O‘zbekiston hududida jami oilalar soni 9 million 729 ming 960 tani tashkil etdi. Shundan 12 foizi ijtimoiy nafaqa va moddiy yordam oluvchi oilalar hissasiga to‘g‘ri kelgan.
Avvalroq 2024-yil yanvar–mart oylarida O‘zbekistonda kam taʼminlangan oilalarga bolalar nafaqasi, moddiy yordam va kompensatsiya to‘lovlari uchun davlat byudjetidan 4,3 trillion so‘m ajratilgani xabar qilingandi. Bunda ijtimoiy nafaqa oluvchi oilalar o‘rtacha soni 1 million 736 mingta bo‘lgan. Shundan 1 million 677 mingtasi bolalar nafaqasi, 58,9 mingtasi moddiy yordam olgan.
Birinchi chorakda davlat byudjetidan Pensiya jamg‘armasiga 3,3 trillion so‘m transfertlar amalga oshirilgan. 2023-yilda fuqarolarning barcha turdagi pensiyalari uchun jami 53 trillion 596 milliard so‘m yo‘naltirilgan. Taqqoslash uchun, 2022-yildagi jami ko‘rsatkich 44,9 trillion so‘mni tashkil etgan.
Izoh (0)