O‘zbekistonda 1-may holatiga yer uchastkasini o‘zboshimchalik bilan egallash bilan bog‘liq 15 826 ta holat aniqlangan. Bu haqda AOKAda o‘tkazilgan brifingda Kadastr agentligi Axborot xizmati rahbari Ne’mat Atamuratov ma’lum qildi.
Keltirilgan ma’lumotlarga ko‘ra, agentlik organlari tomonidan berilgan yozma ko‘rsatmalar asosida 10 041 ta holatda 447,1 gektar (63 foiz) maydondagi qonunbuzilishlar ixtiyoriy bartaraf etilishi ta’minlandi.
O‘zboshimchalik bilan egallangan yer maydonlarini qaytarish va noqonuniy qurilmalarni bartaraf etish bo‘yicha sudlarga 2 814 ta da’vo arizalari kiritildi. Yerga oid qonun buzilishi holatlarida jinoyat alomatlari aniqlangan 384 ta ish hujjatlari belgilangan tartibda prokuratura organlariga yuborildi.
Shuningdek, olib borilgan nazorat tadbirlarida 11 873 nafar shaxsga nisbatan ma’muriy javobgarlik chorasi qo‘llanildi. Joriy yilda respublika bo‘yicha yer uchastkalaridan maqsadsiz foydalanish bilan bog‘liq 2 392 ta (5 830,2 gektar) holat aniqlanib, ulardan 2 389 tasi bo‘yicha hokimliklarga taqdimnomalar kiritildi, 3 ta holatda esa yer uchastkalariga bo‘lgan huquqni bekor qilish yuzasidan sudlarga murojaat qilindi.
Natijada 5 318,8 gektar maqsadsiz foydalanilgan yerlar zaxiraga qaytarilishi ta’minlandi. 2025-yil 1-may holatiga qadar yer uchastkalarini o‘zboshimchalik bilan egallagan 9 292 ta holat fuqarolar tomonidan belgilangan muddatda ixtiyoriy bartaraf etilgani sababli, fuqarolar jami 104,5 milliard so‘mdan ortiq ma’muriy jarimadan ozod etildi.
2024-yil statistikasi
O‘zbekistonda 2024-yilda 66 109 ta holatda yerlarning o‘zboshimchalik bilan egallab olinishi aniqlangan.
2024-yil mobaynida Kadastr agentligi tomonidan olib boriladigan yer va kadastr nazorati yo‘nalishida amalga oshirilgan tadbirlar natijasida:
- 66 109 ta holatda 9 462,3 gektar yerlarning o‘zboshimchalik bilan egallab olish holatlari aniqlanib,
- 41 972 ta holatda 4 472,2 gektar yerda qonunbuzilish holatlari ixtiyoriy ravishda bartaraf etildi.
Shuningdek,21 459 ta holatda 4 654,1 gektar yerga da’vo arizalari kiritildi. 5 561 ta (1 144,5 gektar) da’vo arizalari sudlar tomonidan qanoatlantirildi va majburiy ijroga qaratildi.
Jinoyat va ma’muriy javobgarlik:
- 2 146 ta holatda jinoyat alomatlari bo‘lgan materiallar prokuratura organlariga yuborildi.
- 41 708 ta shaxsga yerga oid huquqbuzarliklar uchun ma’muriy jazo choralari qo‘llanildi.
Izoh (0)