Sanitariya-epidemiologik osoyishtalik va jamoat salomatligi qo‘mitasi raisining birinchi o‘rinbosari Nurmat Otabekov O‘zbekistonda koronavirus bilan bog‘liq epidemiologik vaziyat barqarorligini ma’lum qildi.
So‘nggi paytlarda ba’zi internet nashrlari va ijtimoiy tarmoqlarda koronavirusning yangi to‘lqini dunyoni qamrab olmoqda, degan mazmundagi xabarlar tarqalgandi. Xususan, o‘sish sur’atlari NB.1.81 shtammi bilan bog‘liqligi aytilgan.
“Shu yil mart oyida koronavirusning Xitoyda aniqlangan NB.1.81 shtammi ba’zi mamlakatlar bo‘ylab tarqalayotgani haqida ma’lumotlar bor, lekin COVID-19 ning yangi to‘lqini dunyoni qamrab olmoqda, degan xabarlar asossiz”, deydi Nurmat Otabekov.
Jahon sog‘liqni saqlash tashkiloti 2024-yil 13-apreldan koronavirus bilan kasallanish bo‘yicha kundalik axborot berib borishni to‘xtatgan. Davlatlar miqyosida ham shunday. Nurmat Otabekovning bildirishicha, aslida, shuning o‘ziyoq sayyorada koronavirus bo‘yicha epidemiologik vaziyat barqaror ekanligini anglatadi. Qolaversa, SARS-CoV-2 ning NB.1.81 shtammi keng ko‘lamda yoyilayotganiga doir ma’lumotlarni JSST rasman tasdiqlagani yo‘q.
“Sir emas, dunyoda koronavirus bo‘yicha shov-shuvli axborotlarni tarqatishdan manfaatdor guruhlar bor. Ayni kunlarda e’lon qilinayotgan bu kabi ma’lumotlarni ham shunday izohlasak, to‘g‘ri bo‘ladi. Chunki Yer yuzida yangi to‘lqinning kuzatilish ehtimoli qariyb nolga teng.
O‘zbekiston misolida aytadigan bo‘lsak, mamlakatimizda epidemiologik vaziyat barqaror. Aholida koronavirus shtammiga nisbatan oddiy respirator kasalliklarga bo‘lgani singari munosabat allaqachon shakllangan”, deydi mutaxassis.
Uning ta’kidlashicha, O‘zbekistonmazkur kasallikni diagnostika qilish, davolash imkoniyatiga ega. O‘z navbatida, odamlarda bu xastalikka nisbatan jamoaviy immunitet vujudga kelgan. Nafaqat O‘zbekiston, butun dunyoda holat shunday.
Shu bilan birga, O‘zbekistonda COVID-19 ga chalinganlar oz miqdorda bo‘lsa ham, aniqlanib turganini, ammo murojaat qilgan bemorlarning faqat ikkilamchi surunkali kasalligi bo‘lganlarigina shifoxonada davolanayotganini bildirib o‘tdi. Qolganlari xastalik yengil kechganligi sababli ambulator sharoitda muolaja olyapti.
“Yangi viruslar paydo bo‘ldi, degan xabarlarga kelsak, mana, hozirgacha dunyoda koronavirusning 45 mingga yaqin mutatsiyalari yuzaga keldi va hamon bu jarayon to‘xtagani yo‘q. Biroq o‘tgan davrda ulardan faqat 10-15 tasi kasallik chaqirdi, xolos. Shu ma’noda, mutatsiyalardan vahima yasash kerak emas”, deydi Sanepidqo‘m raisi o‘rinbosari
Nurmat Otabekov O‘zbekiston hududida qaysi viruslar aylanib yurganini kuzatib boruvchi monitoring tizimi yo‘lga qo‘yilgani, tegishli laboratoriyalarda bemorlardan olingan virus namunalari doimiy ravishda tekshirilib, tahlil qilib borilishini eslatib o‘tdi.
Shu ma’noda, dunyoda qayd etilayotgan yangi shtammlar haqida darhol shov-shuvli xabarlar tarqatishga zinhor urinmaslik kerakligini, xavotirga hech qanday asos yo‘qligini bildirdi.
2025-yil boshlarida O‘zbekistonda o‘tkir respirator virusli infeksiyalar avj olgani haqida xabarlar tarqalgandi. Nurmat Otabekov xavotirlanishga asos yo‘qligini, mamlakatda mavsumiy respirator kasalliklar tarqalishi bilan bog‘liq vaziyat barqarorligini ma’lum qilgandi.
“Daryo” pandemiyadan keyingi davrda qanday kasalliklar ko‘proq kuzatilayotgani haqida soha mutaxassislari fikrini jamlagandi.
Izoh (0)