Tokio shahrining Edogava tumanidagi qurilish maydonida yuz bergan portlash oqibatida o‘n nafar shaxs tan jarohati oldi. Jabrlanganlar orasida 20 yoshdan 70 yoshgacha bo‘lgan ishchilar va mahalliy aholi bor. Bu haqda Kyodo News agentligi xabar berdi.
Ma’lum qilinishicha, voqea 27-may kuni ertalab Tokio metropolitenining “Kasai” bekati yaqinidagi turar-joy hududida portlash va undan so‘ng tutun ko‘tarilishi sodir bo‘lgan.
Yong‘inni bartaraf etishga 30 dan ortiq o‘t o‘chirish mashinasi jalb etilgan va u taxminan 90 daqiqa ichida nazorat ostiga olingan.
Politsiya ma’lumotlariga ko‘ra, hodisa paytida ishchilar yangi bino qurish uchun yerga ustunlar qoqayotgan bo‘lgan. Ish jarayonida yer osti gaz quvuri shikastlangan bo‘lishi ehtimoli bor.
Guvohlarning aytishicha, ular ketma-ket beshta portlash ovozini eshitishgan.
Izoh (0)