O‘zbekistonda yil boshidan buyon 4 000 ga yaqin noqonuniy chiqindi tashlash holati aniqlandi, deb xabar bermoqda Ekologiya vazirligi.
Unda aytilishicha, 2025-yilning dastlabki 4 oyida respublikada o‘rnatilgan onlayn kuzatuv kameralari orqali jami belgilanmagan joylarga chiqindi tashlash bilan bog‘liq jami 3 743 ta huquqbuzarlik aniqlangan.
Qayd etilishicha, ayni damda Ekologiya vazirligi Situatsion markazi tomonidan respublika miqyosida jami 250 ta onlayn kuzatuv kameralari o‘rnatilgan bo‘lib, tun-u kun nazorat qilinadi.
Onlayn kameralar orqali nafaqat noqonuniy chiqindi tashlash, balki boshqa turdagi huquqbuzarliklarni ham o‘z vaqtida aniqlash va chora ko‘rish imkonini beradi. Huquqbuzarliklarga nisbatan qonuniy tartibda tegishli choralar ko‘rilmoqda.
O‘zbekistonda 80 gektardan ortiq yer maydoni chiqindi poligonlaridan tabiatga qaytarildi. Hozir chiqindixonalarda atmosferaga chiqarilayotgan tashlanmalarni monitoring qilish, yong‘in xavfsizligini ta’minlash bo‘yicha suv havzasi, sanitar burchaklar, qorovulxona, hojatxona hamda suv quduqlari, dizbaryer qurilmasi barpo etilib, uzluksiz elektr va ichimlik suvi ta’minotiga e’tibor qaratilyapti.
Jumladan, Ekologiya vazirligi Chiqindilarni boshqarish va sirkulyar iqtisodiyotni rivojlantirish agentligi huzuridagi Chiqindi poligonlarini boshqarish direksiyasi tomonidan poligonlardagi 300 ga yaqin maxsus texnikalarga zamonaviy GPS nazorat tizimi o‘rnatilgan. Davlat byudjeti mablag‘lari hisobidan qo‘shimcha 78 ta maxsus texnika xarid qilinib, hududlarga tarqatilgan.
Hozirda jami 184 ta maishiy chiqindi poligonidan 39 tasi tartibga keltirilib, o‘rtacha 70-80 sm tuproq qatlami bilan yopildi, aholi salomatligi, atrof-muhit va ekologiyaga salbiy ta’siriga chek qo‘yilib, yerlar tabiatga qaytarildi.
Joriy yilning birinchi choragida Toshkent, Namangan, Andijon, Buxoro, Sirdaryo, Samarqand, Farg‘ona va Qashqadaryo viloyatlarining jami 14 ta tumanda joylashgan qattiq maishiy chiqindi poligonlarida surish, zichlash, tekislash ishlari amalga oshirildi. 37 ta chiqindi poligoni avtotarozi va kuzatuv kameralari bilan jihozlanmoqda.
Shuningdek, 2025-yil davomida 18 ta chiqindi poligonini rekultivatsiya qilib, tuproq qatlami bilan yopish maqsad qilingan.
“Yashil makon” umummilliy dasturi doirasida respublika bo‘yicha 2024-yilda 123 ta chiqindi poligoni atrofida 461,0 ming tup hamda 2025-yil bahor mavsumida 130 ta chiqindi poligoni atrofida 367,7 ming tup terak, tut, qayrag‘och, saksovul, tol va boshqa turdagi daraxt ko‘chatlari ekilib, “yashil belbog‘”lar tashkil etildi.
Izoh (0)