Gretsiya qirg‘oqni qo‘riqlash xizmati O‘rta Yer dengizidagi Gretsiyaning Rodos, Gavdos va Krit orollari yaqinidagi qayiqlarda so‘nggi kunlarda aniqlangan 600 dan ortiq noqonuniy muhojirni qutqarib oldi. Bu haqda Afina Makedoniya axborot agentligi xabar bermoqda.
Ma’lumotlarga ko‘ra, 25-may kuni Qirg‘oq qo‘riqlash xizmatining muvofiqlashtirilgan harakatlari natijasida muhojirlarni Turkiya qirg‘oqlaridan Rodosga noqonuniy o‘tkazish bo‘yicha puxta tashkil etilgan operatsiya fosh etilgan.
Ma’lum qilinishicha, patrul kateridan Rodosdan Turkiya tomon katta tezlikda suzib ketayotgan shubhali yaxta ko‘zga tashlangan. Qirg‘oqni qo‘riqlash kateri darhol kema ortidan quvib ketgan va tovush hamda yorug‘lik signallaridan foydalanib, to‘xtashni talab qilgan. Xavfli manyovrlarga qaramay, yaxta oxir-oqibat to‘xtagan va uning bortidagi uch kishi — 39, 44 va 45 yoshli Turkiya fuqarolari hibsga olingan. Bunga qadar ular Rodos qirg‘og‘iga 76 nafar chet ellikni — 29 erkak, 17 ayol va 30 nafar voyaga yetmaganni tushirib qoldirgan, so‘ngra politsiya va port xodimlari ularni muhojirlarni qabul qilish markaziga olib borgan. Noqonuniy shaxslarning aytishicha, ular Turkiyaning Fethiye tumanidan yaxtada kelgan va har biri yuk tashish uchun 5500 yevrodan to‘lagan.
Shuningdek, xizmat vakillari 23-25-may kunlari Gavdos oroli yaqinidagi suvlarda 446 kishini, shuningdek, Kritdagi Iraklion shahri janubidagi plyajlarda 104 kishini qutqarib olgan.
Kelganlarning aksariyati erkaklar bo‘lib, ular orasida 2 ayol va 18 nafar voyaga yetmagan bo‘lgan. Muhojirlar orasida besh kishi odam tashuvchi sifatida aniqlanib, qamoqqa olingan.
Qirg‘oqni qo‘riqlash xizmati xodimlarining mahalliy ERT News telekanaliga ma’lum qilishicha, noqonuniy muhojirlar Kritga janubdan asosan osma motorli kichik qayiqlarda kelishadi, yettita qayiqdan faqat bittasi yog‘ochdan yasalgan. Barcha qayiqlar haddan tashqari yuklangan bo‘lib, dengizda kuchli to‘lqinlar bo‘lgan taqdirda Shimoliy Afrika qirg‘oqlaridan Kritgacha tashish juda xavfli.
Kritga kelgan muhojirlarning aksariyati sudanliklar bo‘lib, ular orasida misrliklar va liviyaliklar ham bor. Manbalarga ko‘ra, barcha qayiqlar Liviya qirg‘oqlaridan yo‘lga chiqqan.
So‘nggi yillarda Gretsiya Yaqin Sharq, Osiyo va Afrika mamlakatlaridan kelgan muhojirlar uchun tranzit mamlakatga aylandi. Har yili o‘n minglab muhojirlar va qochqinlar dengiz orqali kelib, Gretsiya orqali Yevropaning boshqa mamlakatlariga o‘tishga harakat qilmoqda.
Izoh (0)