“PSJ” darvozaboniga “Manchester Siti”, “Chelsi” va “Bavariya” qiziqish bildirmoqda

Italiya terma jamoasi posboni Janluiji Donnarumma “Pari Sen-Jermen” klubini tark etishga yaqin turibdi. Bu haqda Football Italia nashri xabar berdi.

Manbaga ko‘ra, parijliklar Donnarummaga jamoani tark etish kerakligini ochiq-oydin bildirgan. Shu bois, yaqin bir hafta ichida uning kelajagi bo‘yicha aniq qaror qabul qilinishi kutilmoqda. Ayni damda darvozabon uchun kurashda “Manchester Siti”, “Chelsi” va “Bavariya” klublari ishtirok etmoqda.

Ma’lumotlarga ko‘ra, “Manchester Siti” yaqin kunlarda transfer borasida faol harakat boshlaydi. “Bavariya” ham darvozabonga qiziqayotganini bildirgan, ammo hozircha muzokaralar boshlanmagan. “Chelsi” esa vaziyatni diqqat bilan kuzatmoqda, biroq hali hech qanday rasmiy taklif bilan chiqmagan.

Avvalroq “PSJ” sport direktori Luish Kampush “Lill” darvozaboni Lyuk Shevalyeni xarid qilish variantini ko‘rib chiqayotgani, shu sabab Donnarumma jamoani tark etishi mumkinligi haqida xabarlar tarqalgan edi. Jurnalist Fabrisio Romanoning xabar berishicha, Parij klubi Lyukni 40 million yevro evaziga xarid qilmoqda. Bu holat Donnarummaning ketishi aniq ekanligini bildiradi.