O‘zbekistonda 2023-yilning o‘tgan davrida daraxtlarning noqonuniy kesilishi bilan bog‘liq 2 427 ta huquqbuzarlik qayd etilib, shundan 714 tup qimmatbaho navli daraxtlar noqonuniy kesilishiga yo‘l qo‘yilgan. Bu haqda Bosh prokuratura matbuot xizmati xabar berdi.
Qayd etilishicha, Qizil kitobga kiritilgan o‘simliklar rejasiz va nazoratsiz yig‘ib olinishi natijasida tabiiy zaxiralar va populyatsiyalarining o‘sish maydonlari qisqarishi kuzatilmoqda.
Masalan, Surxondaryo viloyati “Bobotog‘” davlat o‘rmon xo‘jaligi hududida iyul-sentyabr oylarida 11 550 tup tabiiy holda o‘suvchi tojik kavragi dorivor o‘simligi noqonuniy kesilib, tabiatga 5,7 milliard so‘m zarar yetkazilgani holati yuzasidan jinoyat ishi qo‘zg‘atilib, tergov harakatlari o‘tkazilmoqda.
Respublika bo‘yicha jami 67,7 ming gektar maydonni tashkil etuvchi o‘rmon fondi yer uchastkalarini ijaraga berish bilan bog‘liq 8065 ta hujjatlar xatlovdan o‘tkazilishi natijasiga ko‘ra, o‘rmon fondi yer uchastkalarini qonunchilik hujjatlari talablariga zid ravishda ijaraga berish holatlari aniqlanib, 18 ta jinoyat, 46 ta maʼmuriy va 23 ta intizomiy ishlar qo‘zg‘atilgan hamda noqonuniy egallangan 1539 gektar yerlar o‘rmon fondi hisobiga qaytarilgan.
Umuman nazorat tadbirlari davomida aniqlangan qonun buzilishi holatlarini bartaraf etish to‘g‘risida mutasaddi idoralarga 107 ta taqdimnoma kiritilgan, 206 ta noqonuniy hujjatlarga protest keltirildi, sudlarga to‘rtta daʼvo arizasi kiritildi, 304 nafar shaxslar maʼmuriy va intizomiy javobgarlikka tortilgan, qo‘pol qonun buzilishi holatlari bo‘yicha 7 ta jinoyat ishi qo‘zg‘atilgan hamda 228 nafar fuqarolarning buzilgan huquqlari tiklangan.
Noqonuniy daraxt kesish holatlari
Avvalroq Xorazmda o‘zini tadbirkor deb tanishtirgan shaxslar istirohat bog‘idagi daraxtlarni kesib tashlagandi. Buxoroda 22 tup qarag‘ay noqonuniy kesilib, tabiatga 144,3 million so‘mlik ziyon yetkazilgandi. Farg‘onadagi chegara posti yaqinida 12 tup manzarali daraxt qo‘porib tashlangani xabar qilingandi.
Izoh (0)