Rossiya prezidenti Vladimir Putin yaqin kunlarda AQSH rahbari Donald Tramp bilan bo‘lib o‘tadigan uchrashuvda Ukrainadagi bosib olingan hududlarni tan olishni talab qilmoqchi. Bu haqda Yevropa va Ukraina rahbarlariga tayanib, The Wall Street Journal xabar berdi.
Putin evaziga rus armiyasi yozgi hujum paytida kirgan Sumi, Xarkov va Dnepropetrovsk viloyatlaridan qo‘shinlarni olib chiqishni taklif qilishi mumkin. Kreml bilan kelishuvga intilayotgan Tramp bunday talablarni qabul qilishi ehtimoli bor. Biroq Ukraina va Yevropa mamlakatlari buni rad etishi kutilmoqda.
Bu Trampning Ukrainani urushni davom ettirishda ayblashiga, unga harbiy va razvedka yordamini to‘xtatishiga, keyin esa diplomatik jarayondan butunlay chiqib ketishiga olib kelishi mumkin, deyiladi xabarda.
The Telegraph manbalariga ko‘ra, Ukraina Rossiya tomonidan anneksiya qilingan hududlarni xalqaro miqyosda tan olishga tayyor emas, biroq front chizig‘i bo‘ylab sulhga rozilik bildirish ehtimoli mavjud. Ukraina prezidenti Vladimir Zelenskiy bosib olingan hududlarni harbiy yo‘l bilan qaytarib olish mushkul ekanini tan oladi. U mojaroning diplomatik yechimlarini izlash tarafdori.
Putin va Tramp bu yil bir necha bor telefon orqali muloqot qilgan. AQSH prezidentining “Putindan hafsalam pir bo‘ldi” degan bayonotlariga qaramay, ular o‘rtasida ochiq ziddiyat bo‘lmagan.
Ularning suhbati do‘stona ruhda o‘tadi, garchi Putin ko‘pincha uzoq monologlarga berilib ketsa-da, odatda sabrsiz bo‘ladigan Tramp uni diqqat bilan tinglaydi va Rossiya—AQSH munosabatlari hamda iqtisodiy hamkorlikni tiklash masalalarini muhokama qiladi, deydi manbalar.
Putinning asosiy talabi esa — Ukrainada bosib olingan hududlar ustidan Rossiya nazoratini xalqaro miqyosda tan olishdir.
Izoh (0)