Prezident Shavkat Mirziyoyev Namanganga tashrifini “Gavhar Jewel Group” korxonasidan boshladi. Bu nafaqat ko‘pchilik, hatto uning rahbari Azizbek Abdurasulov uchun ham kutilmagan holat bo‘ldi. Bu haqda tadbirkorning o‘zi “Daryo” muxbiri Azizbek Abduvaliyev bilan suhbati davomida hikoya qildi.

“Zaxira variantdan tashrifning birinchi manziliga aylandik”

Tashrifdan oldin zaxira variant sifatida ko‘rilayotgandik. “Tayyorgarlik ko‘ringlar, kirishlari mumkin” deyishdi. Ochig‘i, bunga o‘zimizning ishchi-xodimlar ham oxirigacha ishonmadi. Chunki tashkil topganimizga hech qancha vaqt bo‘lmagan, hali ko‘pchilik bilmaydi.

Shunday bo‘ldiki, tashrifning birinchi manziliga aylandik. Prezident bo‘limlarimizni birma-bir ko‘rib chiqdi, ishchi-xodimlarimiz bilan gaplashdi. “Yiliga 100 tonna oltin qazib olyapmiz. Lekin uning atigi 6 foizi qayta ishlanyapti. Turkiyada esa 30 tonna qazib olinib, 300 tonna eksport qilinyapti. Bu sohada biroz kechikdik, biroq vaziyatni o‘nglash uchun barcha sharoitlarni yaratamiz” dedi davlat rahbari.

Shu yerning o‘zida turkiyalik hamkorlarimiz va investorlar bilan muloqot bo‘ldi. Buning yaxshi tomoni — ularning bizga bo‘lgan ishonchi yanada ortdi. Ishchilarimiz uchun esa juda katta motivatsiya bo‘ldi.

Tashrifning ertasiga yig‘ilishga taklif etildim. Yig‘ilish tanqidiy ruhda o‘tdi, hokimlar, vazirlarga ko‘plab vazifa va topshiriqlar berildi. Prezident bu yerda meni turg‘izib, “shu yigitga rahmat, 10 ta savolimdan 10 tasiga dadil javob berdi” deb maqtadi. Aylanma mablag‘larni ko‘paytirishga yordam berish, sohasini rivojlantirishga qaratilgan yangi qarorlar tayyorlashga ko‘rsatma berildi.

Aslida hozirning o‘zida zargarlikka juda katta eʼtibor qaratilgan. Birinchidan, oltinni sotib olishga imkoniyat berildi. Ikkinchidan, shu sotib olingan tilla uchun ham mablag‘ni 180 kun kechiktirib to‘lashimiz mumkin. Bu vaqt mobaynida xomashyoni qayta ishlab, mahsulot tayyorlab, uni sotishga ham ulguramiz. Qolaversa, soliqlardan 2026-yilgacha ozod qilinganmiz.

Yaratilgan bu imtiyozlar tufayli hozirning o‘zida ishlab chiqaruvchilarimiz ichki bozorda xorij kompaniyalari bilan raqobatga kirishdi, mahalliy brendlar ko‘paydi.

Stomatologiyadan zargarlikka dadil qadam

O‘zim asli stomatologman. Otam Amerikada shu sohada ishlab yurgan paytlari raqamli stomalogiyani O‘zbekistonga olib kirishni boshladik. Bizda zargarlikka yaqin texnik jihatlar ko‘p, masalan metallokeramika. Qoliplarni 3D printerda tayyorlaymiz. Qiziqish paydo bo‘ldi zargarlik mahsulotlarini ham qolipini quyib ko‘rishga. Qarasak, chakki emas. Chunki zargarlar ko‘pincha qo‘lda tayyorlashadi, standartlariga eʼtibor berilmaydi, modellar har xil chiqadi, jilovi, vazni turlicha. Biz stomatologiyada aniq ishlaganimiz uchun zargarlik mahsuloti ham o‘ta yuqori sifatda chiqdi.

To‘rtinchi-beshinchi avlodda zargar o‘rtoqlarim bor, ular bilan maslahatlashib, zargarlarga qolip yetkazib berishni boshladik. Ammo biz qolip yetkazib bergan zargarlarning ko‘pi baribir biz istagan sifatni chiqarib bera olmadi. Shundan keyin bu sohaga o‘zimiz qadam qo‘yib, 2021-yili to‘la kirishib ketdik, keyingi yili esa korxonamiz tashkil topdi.

Korxonamizni 10 kishidan boshladik. Har bir bo‘limni bosqichma-bosqich ishga tushirdik. 2022-yili 30 kilogramm mahsulot chiqardik, asosiy vaqtimiz mahalliy zargarlarni sanoat usulida ishlashga o‘rgatishga ketdi. 2023-yili 270 kilogramm mahsulot chiqarishga erishdik, ishchilarimiz soni esa 100 nafardan oshdi.

“Brendimizda Chust do‘ppisi aks etgan”

Bilasiz, chet elda kompaniyalarning nomlari ko‘pincha kishilarning ism-shariflari bilan ataladi. Onamning ismlari Gavhar, biz ham shu nomda to‘xtaldik. Logotipimizni ko‘rgan bo‘lsangiz, Chust do‘ppisidagi belgi aks etgan. Namanganni avvalgi gerbida ham shu belgi bor. Shaklini biroz o‘zgartirdik, biroq mohiyat o‘sha-o‘sha. Belgimiz avvalo milliy brendni rivojlantirishni qaratilgan.

Asta-sekin ishimiz ko‘rinib, yutuqlarimiz ham paydo bo‘lyapti. Xususiy zargarlik korxonalar ichida birinchi bo‘lib ISO sertifikatini oldik. Buxoroda bo‘lib o‘tgan hamda 58 davlatdan 270 dan ortiq korxona qatnashgan zargarlik va zardo‘zlik festivalida “Zargarlik sohasida eng yaxshi korxona” nomitsinatsiyasi g‘olibi bo‘lib, birinchi o‘rinni oldik. Dubaydagi xalqaro ko‘rgamada esa sohaga qo‘shgan hissamiz uchun Global Ison mukofotini qo‘lga kiritdik.

Umuman, hisoblab ko‘rsam, o‘tgan yilni o‘zida 20 dan ortiq turli ko‘rgazmalarda qatnashibmiz. Bu qatnashuvlar bizni tanitdi, chunki o‘zim zargar bo‘lmaganim uchun avval hech kim bizni bilmasdi, kontaktlarimiz yo‘q edi. Hozir esa barcha hududlardagi har bir tilla sotiladigan manzillarga mahsulotlarimiz yetib bordi.

“Asosiy eʼtiborni eksportga qaratamiz. Mahsulotlarimiz xorijda sotiladigan vaqt keldi”

Mahsulotlarimizni Qozog‘iston, Qirg‘izistondan kelib opketishyapti, Tojikistondan ulgurji xaridorlar buyurtma qilishni boshladi. Rossiyaliklar franshiza sotib oldi, yaqin kunlarda katta miqdorda kumush va tilla buyumlar eksportini boshlaymiz.

Respublika bo‘ylab yil yakunigacha 14 ta do‘kon ochishni rejalashtirganmiz. Aeroportlardagi dyuti-fri do‘konlarida ham mahsulotlarimiz bo‘ladi nasib.

Prezidentning Namanganga kelgusi tashrifiga qadar mahsulotlarimizning eksportdagi ulushini 80 foizga chiqarish niyatim bor. Hozir 10 nafar mahalliy zargar bilan ishlayotgan bo‘lsak, bu ko‘rsatkich yaqin orada 100 nafarga yetadi.