Turkiya bozorlarida haqiqiy oltindan ajratish qiyin bo‘lgan qalbaki oltin bilan savdo qiluvchi firibgarlar paydo bo‘ldi. Bu haqda oltin va pul bozori bo‘yicha mutaxassis Isam Memishga tayanib CNN Turk xabar berdi.
“Firibgarlar zargarlik ustaxonalariga o‘xshash sexlar tashkil etib, bozorga taqlid qilingan, past sifatli yoki butunlay soxta mahsulotlarni chiqarmoqda. Odatda ular bu mahsulotlarni internet orqali sotishadi”, deb ta’kidladi u.
Memishning taxminicha, soxta qimmatbaho metallarning tarqalishi yoz mavsumida oltin narxlarining ko‘tarilishi va pasayishi bilan bog‘liq bo‘lishi mumkin.
Uning so‘zlariga ko‘ra, firibgarlar zargarlarni ham aldamoqda. Shu sababli savdogarlar himoya usulini ishlab chiqishga majbur bo‘lishdi: qachonki firibgar do‘konga kelsa, uni suratga yoki videoga tushirishadi, so‘ngra boshqa savdogarlar bilan birgalikdagi guruhga jo‘natishadi. Bu orqali ular firibgarni oldindan tanib olish imkoniyatiga ega bo‘lishadi.
“Agar siz 10 ta zargarlik do‘koniga kirsangiz, 10 ta qalbaki tilla topasiz. Qonunlar yoki qoidalar yo‘qligi sababli, firibgarlar erkin yuribti”, deydi u.
Izoh (0)