Yulduzlar kiyimda ham, taqinchoqlarda ham obrazni kamdan-kam takrorlaydi. Ayniqsa, millionlab dollar turadigan qimmatbaho taqinchoqlar haqida gap ketganda. Ba’zilari bir kechaga taqiladi-yu, keyin yana qutisiga qaytadi. Ushbu maqolada mashhur yulduzlar bir marotaba taqqan, qiymati millionlab dollarga teng bo‘lgan taqinchoqlar haqida bilib olasiz.
Ledi Gaga va 30 million dollarlik Tiffany marvaridi
Ledi Gaga 2019-yilgi “Oskar” marosimiga qora libosda chiqqan. Tadbirda hammaning e’tiborini o‘ziga qaratgan narsa — 30 million dollarlik Tiffany marvaridli taqinchoq edi.
Bu bezak oddiy emas. 1878-yilda Tiffany kompaniyasi asoschisi Charls Tiffani uni sotib olgan, keyinchalik unga maxsus qimmatli ko‘rinish berilgan. Avvalroq bu marvaridni faqat mashhur aktrisa Odri Xepbern taqqan.
Marosimdan keyin Gaga uni hali yechmagan edi, lekin keyinchalik Tiffany kompaniyasining qo‘riqchilari uni muloyimlik bilan qaytarib olishgan. Gaga hatto do‘stlari bilan “Tako Bell” kafesiga borayotganida, mashinasi yo‘lda to‘xtatilganini aytgan.
Zendaya va 6 million dollarlik Bvlgari taqinchog‘i
Zendaya 2021-yilgi “Oskar”da sariq rangli uzun libosda paydo bo‘ldi. U bo‘yniga Bvlgari brendining 183 qirotli sariq olmosli taqinchog‘ini taqqan. Uning narxi 6 million dollar.
Libos va taqinchoq birga juda jozibali ko‘rinishga sabab bo‘lgan. Stilist bu obrazni 1970-yillardagi mashhur qo‘shiqchi Sherdan ilhomlanib yaratgan. Taqinchoqdan keyin Zendaya uni boshqa hech qayerda taqmagan. Ammo bu — “Oskar” tarixidagi eng unutilmas obrazlardan biri bo‘lib qolgan.
Rianna va 400 ming dollarlik oyoq soati
Rianna har doim o‘zining qimmatbaho zargarlik buyumlari bilan ajralib turadi. 2023-yilda “Formula-1” musobaqasiga qora libosda chiqqan. Eng qiziq tomoni uning oyog‘ida Jacob&Co kompaniyasining 70 qirotli, 400 ming dollarlik soati bo‘lgan.
Bu soat aynan Rianna uchun tayyorlangan. U qo‘llarini yopib turadigan kiyimda bo‘lgani uchun, soatni oyog‘iga taqqan. Ijtimoiy tarmoqlarda bu holat muhokamalarga sabab bo‘lgan. Ba’zilar “ortiqcha” deb hisoblagan, boshqalar esa “ajoyib hazil” deb baholagan.
Kerri Andervud va 400 ming dollar turadigan taqinchoq
2013-yilda “Gremmi” marosimida qo‘shiqchi Kerri Andervud taxminan 400 ming dollarlik oq olmosli taqinchoq taqqan. Uning og‘irligi 381 qirot.
Xonanda bu taqinchoqni taqqani uchun juda hayajonlanganini tan olgan.
Men undan qimmat emasman, kimdir uni o‘g‘irlab ketadimi deb qo‘rqdim, hazillashgan u.
Garchi Kerri mukofot olmagan bo‘lsa-da, libosi va taqinchoqlari hali ham esda qolgan.
Yulduzlar taqqan qimmat taqinchoqlar ularning o‘ziga tegishli bo‘lishi mumkin, lekin ba’zan bu — zargarlik kompaniyalari bilan kelishilgan hamkorlik bo‘ladi. Ko‘pincha bu taqinchoqlar marosim tugagach qaytariladi. Hatto ayrim taqinchoqlarning o‘z qo‘riqchilari ham bo‘ladi.
Shuning uchun mashhurlar marosimda chiroyli ko‘rinish bilan birga, o‘zlaridagi “boylik” uchun ham xavotir olishadi.
Izoh (0)