Хоразмда божхоначилар 1 млрд сўмлик тилла тақинчоқларнинг ноқонуний айланмасига чек қўйди. Бу ҳақда Божхона қўмитаси матбуот хизмати хабар берди.
Маълум қилинишича, шубҳа остига олинган шахс тегишли рухсатномасиз тилладан тайёрланган 5,95 грамм оғирликдаги 1 дона узукни ноқонуний равишда сотаётган вақтида тўхтатиб қолинди.
Мазкур фуқарога тегишли савдо шохобчасида ҳеч қандай ҳужжатлари бўлмаган 1 кг дан зиёд оғирликдаги заргарлик буюмлари борлиги аниқланди.
Ҳозирда қиймати дастлабки ҳисоб-китобларга 1 млрд сўмни ташкил қилувчи 1 кг дан зиёд оғирликдаги заргарлик буюмлари вақтинча сақловга олинди.
Ҳозирда ҳолат юзасидан терговга қадар текширув ҳаракатлари олиб борилмоқда.
Заргарлик буюмларининг ноқонуний айланмаси
Рақамларга кўра, республика божхоначилари томонидан 2025 йилнинг ўтган даври мобайнида аниқланган 252 та божхона қонун бузилиши ҳолатларида қиймати 24,3 млрд сўмлик салкам 40 кг оғирликдаги заргарлик буюмларининг божхона чегаралари олиб ноқонуний равишда олиб ўтилиши ва ички ҳудуддаги яширин айланмасига чек қўйилган.
Маълумот учун, жисмоний шахслар 2025 йилнинг 20 июлидан шахсий эҳтиёж учун мўлжалланган заргарлик буюмларини нотижорат мақсадларида республикага олиб кириладиган товарларнинг божсиз олиб кириш нормалари доирасида олиб киришлари мумкин.
Мазкур норма ҳаво транспортида — 1000 доллар, темир йўл ва дарё транспортида — 500 доллар ҳамда автомобиль (пиёда) ўтказиш пунктлари орқали — 300 долларни ташкил қилади.
Олиб чиқишда эса жисмоний шахсларга оғирлиги 200 граммгача бўлган кумушдан ҳамда 65 граммгача бўлган олтин ва бошқа қимматбаҳо металлардан ясалган тайёр заргарлик буюмларини йўловчи божхона декларациясини тўлдирмасдан, ушбу миқдорлардан ортиқ бўлганларини йўловчи божхона декларацияси асосида божхона ҳудудидан ташқарига олиб чиқишга рухсат берилади.
Изоҳ (0)