Hind filmlaridagi turli bezaklar, zargarlik buyumlari va qahramonlarning liboslari alohida e’tirofga loyiq. Ba’zi tomoshabinlar Bollivud kinolari syujetining soddaligidan kulishi mumkin, ammo Bollivudda syujetdan ko‘ra qahramonlarning tashqi ko‘rinishi va dekoratsiyaga katta e’tibor beriladi. Bunga qahramonlar kiygan qimmatbaho liboslar va zargarlik buyumlari yaqqol misol.
Taniqli rejissyor Sanjay Lila Bhansali filmlarida mohirona va did bilan tanlangan bezaklar to‘plami va liboslar bilan mashhurdir. Yaqin orada u o‘zining ilk serialini taqdim etish arafasida. Serial “Xiramandi: olmoslar bozori” deb nomlanadi va loyiha uchun rejissyor talabiga ko‘ra 300 kilogrammdan ortiq qimmatbaho zargarlik buyumlariga buyurtma berilgan.
Kolleksiya 10 mingdan ortiq taqinchoqlardan iborat bo‘lib, Manisha Koyrala, Sonakshi Sinha, Aditi Rao Xidari, Richa Chadha, Sharmin Sigal va Sanjida Shayh kabi hind aktrisalari uchun mo‘ljallangan.
“Xiramandi: olmoslar bozori” serial premyerasini intiqlik bilan kutar ekanmiz, hozircha so‘nggi yillarda taqdim etilgan eng yaxshi sahna dekoratsiyasi va aktrisalar liboslariga ega mashhur hind filmlarini yodga olamiz.
“Devdas” (2002)
Hind kinematografiyasida alohida o‘ringa ega bo‘lgan “Devdas” filmi hanuzgacha sevib tomosha qilinadi. Unda liboslar bo‘yicha rassom Nita Lulla faol ish olib borgan. Asarda har bir taqinchoq aktrisalar husniga husn bag‘ishlagan. Aktrisa Ayshvariya Raydagi anor tasvirli kundan bezagi filmning eng yorqin zargarlik buyumlaridan bo‘lgan.
(Kundan — qimmatbaho toshlardan yasalgan va tomoqqa taqiladigan keng zargarlik buyumlari turi)
“Jodxa va Akbar” (2008)
Musulmon hukmdor va Rajput malikasining muhabbat tarixi haqidagi filmda dizaynerlar tomonidan yaratilgan Ayshvariya Rayning obrazi tahsinga loyiq. Filmda aktrisa qiymati salkam 2,5 million dollarlik va og‘irligi 200 kilogramm bo‘lgan tilla taqinchoqlar bilan bezangan.
Tilla buyumlar xavfsizligini ta’minlash maqsadida ishlab chiqarish jarayonida 50 ga yaqin qo‘riqchi yollangan.
“Bajirao va Mastani” (2015)
Ushbu rang-barang va o‘ziga jalb etuvchi filmda dekoratsiyaning barcha elementlari bor: Mastani rolini ijro etgan aktrisa Dipika Padukonening nathidan tortib (nath — burunga taqiladigan hind taqinchog‘i) Priyanka Chopraning kundanigacha.
Har bir zargarlik buyumlari qadimiy naqshlar asosida yaratilgan bo‘lib, 24 karatlik oltindan yasalgan. Ishlab chiqaruvchilar zargarlik buyumlarini loyihalash uchun bir yil vaqt sarflagan.
Padmavati (2018)
Bosh rolni ijro etgan aktrisa Dipika Padukone filmda 30 kilogramm og‘irlikka ega lexengi (yubka) va 30 kilogramm taqinchoq buyumlari bilan namoyon bo‘lgan.
Baxubali (2015, 2017)
Rejissyor Rajamulining ushbu filmi 2015-yilda suratga olingan bo‘lib, filmda malika Devasen obrazini aktrisa Anushka Shetti gavdalantirgan. Ushbu filmda ham bosh qahramon boshdan oyoq tilla buyumlar bilan bezangan.
Izoh (0)